अमेरिकन इन्व्हेस्टमेंट रिसर्च फर्म हिंडेनबर्गच्या नवीन आरोपांनी देशातील आर्थिक आणि राजकीय क्षेत्र ढवळून निघालंय. हिंडेनबर्गनं यावेळी थेट सेबीच्या अध्यक्षा माधवी बुच आणि त्यांचे पती धवल बुच यांनाच लक्ष केलंय.

अदानी घोटाळ्यासाठी वापरलेल्या दोन्ही बनावट परदेशी फंडांत या दोघांची भागीदारी असल्याचा आरोप ‘हिंडेनबर्ग रिसर्च’नं केला आहे. माधुरी पुरी बुच यांचे अदानी उद्योगसमूहात हितसंबंध गुंतलेले असल्याने त्यांनी या उद्योगसमूहावर १८ महिन्यांपासून कारवाई करणे टाळलं, असंही हिंडेनबर्गनं म्हटलंय.

हिंडेनबर्गच्या या ताज्या रिपोर्टवरुन आर्थिक जगतात खळबळ उडाली आहे. विरोधकही आक्रमक झालेत. पंतप्रधान स्वतः या कटाचा एक भाग आहेत असा आरोप करत जेपीसी म्हणजेच संयुक्त संसदीय समितीकडून चौकशीची मागणी काँग्रेसने केली आहे. मात्र सेबीच्या अध्यक्ष माधवी बुच आणि त्याचे पती धवल बुच यांनी हिंडेनबर्गचे आरोप फेटाळून लावलेत.

10 ऑगस्ट 2024 च्या हिंडनबर्ग अहवालात आमच्यावर करण्यात आलेल्या आरोपांवर आम्ही सांगू इच्छितो की, आम्ही या निराधार आरोपांचे खंडन करतो. त्यात तथ्य नाही. आमचे जीवन आणि आर्थिक परिस्थिती खुल्या पुस्तकासारखी आहे. सर्व आर्थिक कागदपत्रे दाखवण्यात आम्हाला कसलाही संकोच नाही. सेबीच्या कारणे दाखवा नोटीस आणि कारवाईला प्रत्युत्तर म्हणून हिंडेनबर्गने हा 'चारित्र्यहननाचा प्रयत्न' केला आहे. हिंडेनबर्ग रिसर्चचं भूत मोदी सरकारच्या मानगुटीवर बसलं आहे. यातून पंतप्रधान मोदी आणि भाजप आपली कशी सुटका करुन करणार ? याकडे सर्वांचं लक्ष आहे.