नवी दिल्ली - राज ठाकरे (Raj Thackeray) यांनी गुढीपाडवा मेळाव्यात मुख्यमंत्री उद्धव ठाकरे यांच्यावर टीका केली होती. त्यानंतर आता सत्ताधारी आणि विरोधकांमध्ये आरोप-प्रत्यारोपाच्या फैरी सुरु झाल्या आहेत. आदित्य ठाकरे (Aditya Thackeray) यांनी मनसे ही भाजपची (BJP) सी टीम असल्याची खोचक टीका केली. तर यावर मनसे नेते संदीप देशपांडे यांनी शिवसेना (Shivsena) राष्ट्रवादीची ढ टीम असल्याचं प्रत्युत्तर दिले आहे. त्यातच आता संजय राऊत यांनी या प्रकरणात उडी घेतली आहे. शिवसेना नेते संजय राऊत (Sanjay Raut) यांनी दिल्लीमध्ये पत्रकार परिषद घेतली. यावेळी त्यांनी मनसेवर जोरदार टीका केली.

हे देखील पहा -

शिवसेना राष्ट्रवादीची ढ टीम असल्याचं मनसे नेते संदीप देशपांडे यांनी म्हटलं आहे. यावर संजय राऊत म्हणाले की, कोणती कोणाची टीम आहे हा त्यांचा प्रश्न आहे. तोंडाच्या कोणत्या वाफा दवडायच्या हा त्यांचा प्रश्न आहे. महाराष्ट्राच्या राजकारणात शिवेसना मेरिटमध्ये आली आहे आणि त्यामुळेच राज्यात शिवसेनेचा मुख्यमंत्री झाला. राज्याचं नेतृत्व शिवसेना करते याचा अर्थ शिवसेनेला राजकारण उत्तम कळतं, शिवसेनेत निर्णय घेण्याची क्षमता आहे. त्यामुळेच राज्यातील जनतेचा शिवसेनेला पाठिंबा आहे. सतत तीन वेळा देशातील पाच मुख्यमंत्र्यांच्या टॉप लिस्टमध्ये महाराष्ट्राचे मुख्यमंत्री आले आहेत. हे जर कुणाला कळत नसेल तर त्यांचा नंबर राजकारणात ढ पेक्षा खाली मानावा लागेल, अशा शब्दात शिवसेना नेते खासदार संजय राऊत यांनी मनसेवर पलटवार केला.

Edited By - Shivani Tichkule