माजी मुख्यमंत्री अखिलेश यादव यांच्या पत्नी, खासदार डिंपल यादव यांच्या पोशाखावर वादग्रस्त वक्तव्य करणाऱ्या मौलाना साजिद रशीदी यांना मारहाण झाल्याची घटना घडली आहे. एका न्यूज चॅनलच्या स्टुडिओमध्ये मौलाना साजिद यांना मारहाण झाली. मौलाना साजिद यांना समाजवादी पक्षाच्या कार्यकर्त्यांनी कानशिलात लगावल्याची माहिती मिळाली आहे.

मौलाना साजिद यांच्या मारहाणीचा व्हिडिओ सोशल मीडियावर व्हायरल झाला आहे. व्हिडिओमध्ये दिसत आहे की, समादवादी पक्षाचे कार्यकर्ते मौलाना साजिद यांना घेरतात. त्यानंतर काही कार्यकर्त्यांनी थेट मौलाना साजिद यांना मारहाण केली. सपाचे प्रवक्ते श्याम सिंह भाटी, मोहित नागर, प्रशांत भाटी यांनी मौलाना साजिद यांना मारहाण केल्याची माहिती मिळाली आहे.

आम्ही राष्ट्रीय नेत्याचा अपमान सहन करू शकत नाही, असं म्हणत कार्यकर्त्यांनी मारहाण केली. त्यांच्या वक्तव्यामुळे त्यांना मारहाण केल्याचा दावा कार्यकर्त्यांनी केला. काही दिवसांपूर्वी मौलाना साजिद यांनी खासदार डिंपल यादव यांच्या कपड्यांवर टिप्पणी केली होती. या टिप्पणीनंतर मौलाना यांना मारहाण झाल्याचे समोर आलं आहे.

मौलाना साजिद रशिदी यांनी मशिदीच्या दौऱ्यावर असलेल्या महिला खासदाराच्या पोशाखावर टिप्पणी केली होती. मौलाना यांनी म्हटलं होतं की, 'मी एक फोटो दाखवतो. तो फोटो पाहून लाज वाटेल. मी कोणाचं नाव घेऊ इच्छित नाही. कारण सर्वजण त्यांना ओळखतात. एकाने मुस्लिम महिलेसारखे कपडे परिधान केले होते. तिच्या डोक्यावर पदर होता. दुसरी महिला डिंपल यादव होती. त्यांचाही फोटो पाहू शकता. त्यांची पाठ दिसत आहे'.