झारखंडची राजधानी रांची येथून एक दु:खद घटना समोर आली आहे. हटिया धरणात चार पोलिसांचा बुडून मृत्यू झाला आहे. दरम्यान, पोलिसांच्या माहितीनुसार, एका पोलिसाचा अद्याप शोध लागलेला नाही. वृत्तानुसार, चार पोलीस एका चारचाकीतून प्रवास करीत होते. प्रवास करत असताना चालकाचे गाडीवरील नियंत्रण सुटले. गाडी थेट धरणात जाऊन कोसळली. यामुळे चौघेही पाण्यात बुडाले.

नेमकं काय घडलं?

मिळालेल्या माहितीनुसार, शनिवारी सकाळी चार पोलीस एका कारमधून प्रवास करीत होते. त्यांची गाडी हटिया धरणाजवळ पोहोचताच चालकाचा गाडीवरील ताबा सुटला. कार थेट धरणात पडली. कार बुडाल्यानंतर प्रत्यक्षदर्शींनी घटनास्थळी धाव घेतली. तसेच तपासाला सुरूवात केला. शोधकार्यादरम्यान, तीन पोलिसांचे मृतदेह पोलिसांना सापडले.

मात्र, चौथ्या पोलिसाचा मृतदेह सापडला नाही. चौथ्या पोलिसाचाही मृत्यू झाल्याची भीती व्यक्त केली जात आहे. सध्या चौथ्या पोलिसाच्या मृतदेहाचा तपास सुरू आहे. ४ पोलिसांचा मृतदेह आढळल्यानं गावातून शोककळा व्यक्त केली जात आहे. तसेच पोलिसांच्या कुटुंबावर देखील दुखा:चा डोंगर कोसळला आहे.

मिळालेल्या माहितीनुसार, चार पोलिसांपैकी २ जण न्यायिक अधिकाऱ्यांचे बॉडीगार्ड होते. तर, एक सरकारी चालक होता. धरणात वाहन बुडाल्यानं चौघांचाही मृत्यू झाला. उपेंद्र कुमार आणि रॉबिन कुजू अशी मृत पोलिसांची नावे आहेत. सध्या शोधमोहिम आणि पोलिसांकडून तपास सुरू आहे.