आम आदमी पक्षाचे खासदार राघव चढ्ढा यांना राज्यसभेच्या उपनेते पदावरून हटवण्यात आलं आहे. राघव यांच्या जागी पंजाबमधून अशोक मित्तल यांची उपनेतेपदी नियुक्ती करण्यात आली आहे. राघव चढ्ढा यांना पदावरून हटवल्यानंतर राजकीय वर्तुळात चर्चांना उधाण आलं आहे. राघव चढ्ढा आता भाजपमध्ये प्रवेश करू शकतात, असा दावा माजी मुख्यमंत्र्यांनी केलं आहे.

दिल्लीचे माजी मुख्यमंत्री, वरिष्ठ नेते आतिशी यांनी राघव चढ्ढा यांच्यावर भाष्य केलं आहे. आतिशी यांनी म्हटलं आहे की, 'भाजपची एक एसओपी आहे. ते आधी नेत्यांना घाबरवतात. त्यानंतर धमकी देतात. काही वेळानंतर आमिष देतात. विरोधी पक्षातील अनेक नेत्यांनी घाबरून भाजपमध्ये प्रवेश केला आहे. आता राघव देखील भाजपमध्ये प्रवेश करण्याची शक्यता आहे'.

दिल्ली विधानसभेतील विरोधी पक्षनेत्या आतिशी यांनी म्हटलं की, 'देश एका संकटाचा सामना करत आहे. लोकशाहीवर हल्ला होतोय. दिल्लीत मतदारांची नावे कमी करण्यात आली. भाजप कार्यकर्त्यांकडून बोगस मतदान करण्यात आले. प्रशासनाचा गैरवापर करण्यात आला. भाजपने दिल्लीत मतचोरी केली आहे. आता पश्चिम बंगालमध्येही मतचोरी केली जात आहे'.

'टीएमसी मुख्य निवडणूक आयुक्तांविरुद्ध महाभियोगाचा प्रस्ताव आणते, त्यावेळी चढ्ढा सही करण्यास नकार देतात. लोकशाहीवरील हल्ल्याच्या विरोधात पंतप्रधान नरेंद्र मोदींच्या विरोधात विरोधी पक्षातील नेते सभात्याग करतात. त्यावेळी चढ्ढा सभात्याग करण्यास नकार देतात. एलपीजी संकटावेळी सर्वसामान्य रांगेत उभे राहतात, तर काही जण काळ्या बाजारातून सिलिंडर खरेदी करतात. या प्रश्नावर पक्षाने आवाज उचलण्यास सांगितलं. त्यावेळी ते आवाज उचलण्यास नकार देतात. याचा अर्थ स्पष्ट आहे की, राघव चढ्ढा हे भाजप आणि पंतप्रधान नरेंद्र मोदी यांना घाबरले आहेत. त्यांच्या विरोधात बोलायला तयार नाहीत'.