Punjab Influencer Manjeet Kaur Death Case : पंजाबमधील प्रसिद्ध सोशल मीडिया इन्फ्लुएन्सर मनजीत कौर (वय २८) यांच्या निर्घृण हत्येप्रकरणात एक धक्कादायक माहिती समोर आली आहे. मनजीत कौर यांचे अपहरण करून त्यांना जंगलात एका झाडाला बांधून जिवंत जाळण्यात आले होते. या घटनेनंतर तब्बल दोन महिने रुग्णालयात मृत्यूशी झुंज दिल्यानंतर २६ ऑगस्ट रोजी त्यांचा मृत्यू झाला. दरम्यान, समोर आलेल्या पोस्टमार्टम (Autopsy) अहवालानुसार मनजीत या ७ आठवड्यांच्या गरोदर होत्या. या खुलाशामुळे आरोपींनी एकाच वेळी दोन जीवांचा बळी घेतल्याचे उघड झाले आहे.

अपहरण करून जंगलात जाळले

मनजीत कौर यांच्या आई कांता देवी यांनी दिलेल्या तक्रारीनुसार, ३ आणि ४ जुलैच्या मध्यरात्री मनजीत यांच्या ओळखीच्या शुभी आणि पिंडा यांनी त्यांना चंदीगडमधील सेक्टर ३४ येथे बोलावून घेतले. तेथे त्यांच्यावर हल्ला करून जबरदस्तीने गाडीत बसवले आणि मोरिंडा येथील जंगलात नेले. तेथे एका झाडाला बांधून त्यांना जाळण्यात आले. एका ओळखीच्या व्यक्तीने घटनास्थळी धाव घेत ब्लँकेटच्या साहाय्याने आग विझवली. त्यानंतर त्यांना तातडीने रुग्णालयात दाखल करण्यात आले.

जबाब नोंदवण्याआधीच प्राणज्योत मालवली

पीजीआयएमईआर (PGIMER) रुग्णालयात उपचारादरम्यान मनजीत यांना शुद्ध आली होती. त्यांनी पोलिसांना आपला अंतिम जबाब नोंदवण्याची विनंतीही केली होती. मात्र, पोलीस अधिकारी रुग्णालयात पोहोचेपर्यंत २६ ऑगस्ट रोजी त्यांचा मृत्यू झाला.

पोलीस तपासाला वेग

या प्रकरणी पोलिसांनी संशयित आरोपी शुभी आणि पिंडा यांच्याविरोधात अपहरण आणि हत्येचा गुन्हा दाखल केला आहे. हत्येमागे प्रेमसंबंध, आर्थिक वाद की अन्य काही कारण आहे, या सर्व बाजूंनी पोलीस सध्या कसून तपास करत आहेत.