वृत्तसंस्था: पंतप्रधान नरेंद्र मोदी (PM Narendra Modi) यांनी रविवारी नवी दिल्लीमध्ये लोककल्याण मार्गावर त्यांच्या अधिकृत निवासस्थानी उत्तर प्रदेश, गोवा आणि उत्तराखंडमधील सरकार स्थापनेविषयी बैठक घेतली आहे. या बैठकीमध्ये केंद्रीय गृहमंत्री अमित शहा (Amit Shah), संरक्षण मंत्री राजनाथ सिंह (Rajnath Singh), पक्षाचे राष्ट्रीय सरचिटणीस (संघटन) बीएल संतोष, राष्ट्रीय अध्यक्ष जे. पी. नड्डा हे देखील उपस्थित होते, अशी माहिती सूत्रांनी दिली आहे.

हे देखील पहा-

योगी आदित्यनाथ (Yogi Adityanath) २५ मार्च दिवशी दुसऱ्यांदा उत्तर प्रदेशच्या मुख्यमंत्रीपदाची शपथ घेणार आहेत. मात्र, त्यांच्या मंत्रीमंडळामध्ये कोणाचा समावेश होणार याविषयी कोणती देखील बातमी आली नाही. भाजप आता मंत्रीमंडळ आणि मंत्रीमंडळाच्या यादीमध्ये शेवटच्या क्षणी बदल करण्याच्या प्रक्रियेमध्ये आहे. उत्तर प्रदेशच्या नवनिर्वाचित भाजप सरकारचा शपथविधी सोहळा २५ मार्च दिवशी दुपारी ४ वाजता होणार आहे.

याअगोदर, कदाचित २१ मार्च रोजी काळजीवाहू मुख्यमंत्री योगी आदित्यनाथ यांची भाजप विधिमंडळ पक्षाच्या नेतेपदी निवड केली जाणार आहे. योगी आदित्यनाथ सलग दुसऱ्यांदा राज्याचे मुख्यमंत्री होणार आहेत. योगींच्या नेतृत्वाखाली नुकत्याच पार पडलेल्या निवडणुकीमध्ये भाजपने दणदणीत विजय मिळवला आहे. उत्तराखंडमध्ये भाजपने घवघवीत यश मिळवके आहे.

मात्र, येथील मुख्यमंत्री धामी यांना खटिमा येथून हार स्वीकारावी लागली आहे. तरी देखील त्यांचे नाव मुख्यमंत्रीपदासाठी आघाडीवर असल्याचे सांगितले जात आहे. मात्र, चौबट्टाखालचे आमदार सतपाल महाराज, श्रीनगरचे धन सिंह रावत आणि राज्यसभा सदस्य अनिल बलूनी अशी काही इतर नावे दावेदारांमध्ये आहेत, असे सूत्रांकडून माहिती मिळाली आहे.

Edited By- Digambar Jadhav