पुणे : दिल्लीच्या 'जंतर मंतर'वर कॉकरोच जनता पार्टीने जोरदार आंदोलन केलं. दिल्लीनंतर कॉकरोच जनता पार्टीने देशातील विविध शहरात आंदोलन करण्याची रणनीती आखली आहे. त्यानुसार कॉकरोच जनता पार्टी पुण्यात आंदोलन करणार आहे. या आंदोलनादरम्यान कॉकरोच जनता पार्टीचे संस्थापक अध्यक्ष अभिजीत दीपके यांच्यावर संजय राऊत यांनी खळबळजनक आरोप केला आहे. संजय राऊत यांच्या दाव्यावर अभिजीत दीपके यांनी पहिली प्रतिक्रिया दिली आहे.

अभिजीत दीपके हे सध्या पुणे दौऱ्यावर आहेत. या दौऱ्यादरम्यान दीपके यांनी माध्यमांशी संवाद साधला. यावेळी त्यांनी संजय राऊत यांनी केलेला दावा फेटाळून लावला. अभिजीत दीपके म्हणाले, 'पुण्यात आज आंदोलन होणार आहे. आज आम्ही कॉकरोच जनता पार्टी चा जाहीरनामा जाहीर करणार आहोत. आमच्या जाहीरनाम्यामध्ये तरुणांसाठी अनेक गोष्टी असणार आहेत. माझा नीट पेपरफुटी प्रकरणी सुरू असलेल्या तपासाबाबत माझा यंत्रणावर विश्वास नाही'.

'माझी आणि पंतप्रधान मोदी यांची कशी भेट होईल? ते खूप मोठे आहेत आणि पंतप्रधान आहेत. माझी कुठली ही भेट पंतप्रधान नरेंद्र मोदींशी झालेली नाही. संजय राऊत यांच्याकडे असलेला फोटो एआयने तयार केलेला असावा. आमची संजय राऊत यांच्याशी चर्चा करण्याची तयारी आहे, असेही दीपके यांनी सांगितले.

संजय राऊत यांची पोस्ट जशीच्या तशी

कॉकरोच जनता पार्टी हा भारतीय तरुणांचा संताप आणि चीड आहे. या तरुणांची फसगत होता कामा नये, उलट तो संताप अधिक प्रभावी आणि नियोजित मार्गाने व्यक्त होणे गरजेचे आहे, असे माझे मत आहे. शिवसेना पक्षप्रमुख उद्धव ठाकरे यांनी पहिल्याच दिवशी तरुणांचे आंदोलन यशस्वी होण्याबाबत शुभेच्छा दिल्या. तरुणांना न्याय आणि दिशा हवी आहे. या आंदोलनात संघ प्रवृत्ती घुसून त्यांचे 'अण्णा' आंदोलन होऊ नये यासाठी कॉकरोच जनता पार्टीच्या नेत्यांना सतर्क राहावे लागेल, बाकी काय? मोदींना पंतप्रधानपदी बारा वर्षे झाली तो उत्सव डोळे भरून बघत राहूया, जय महाराष्ट्र