अहमदाबाद : गुजरातमधील (Gujrat) मोरबी भागात रविवारी एक मोठी दुर्घटना घडली. मच्छू नदीवरील एक तरंगता पूल कोसळला. ज्यामध्ये 131 जणांचा मृत्यू झाला आहे. तर अनेक जण जखमी झाल्याची भीती व्यक्त केली जात आहे. या दुर्घटनेबाबत बोलताना पंतप्रधान नरेंद्र मोदी (PM Narendra Modi) देखील भावुक झाले आहेत.

पंतप्रधान नरेंद्र मोदी गुजरातमधील केवडिया येथे सरदार वल्लभभाई पटेल यांच्या जयंतीनिमित्त राष्ट्रीय एकता दिवसात सहभागी झाले होते. त्याआधी ते स्टॅच्यू ऑफ युनिटी येथे श्रद्धांजली वाहण्यासाठी पोहोचले होते. तेथे बोलतांना मोदी भावुक झाले. (Latest News)

पीएम मोदी म्हणाले की, मी एकता नगरमध्ये आहे पण माझे मन मोरबीतील पीडितांशी जोडले गेलेले आहे. या दुर्घटनेत मृत्युमुखी पडलेल्यांच्या कुटुंबियांप्रती मी संवेदना व्यक्त करतो. सरकार प्रत्येक प्रकारे पीडित कुटुंबांच्या पाठीशी आहे.

गुजरात सरकार काल संध्याकाळपासून मदत आणि बचाव कार्यात गुंतले आहे. केंद्र सरकारकडून गुजरात सरकारला सर्वतोपरी मदत केली जात आहे. NDRF आणि लष्कर तैनात आहे. PM मोदींनी आश्वासन दिले आहे की बचाव आणि मदत कार्यात कोणतीही कमी पडणार नाही.

मदतीची घोषणा

पंतप्रधान नरेंद्र मोदी यांनी दुर्घटनेत मृत्युमुखी पडलेल्यांच्या नातेवाईकांना 2 लाख रुपये आणि जखमींना 50 हजार रुपयांची मदत जाहीर केली होती. याशिवाय गुजरात सरकारकडून मृतांच्या कुटुंबीयांना 4 लाख रुपये आणि जखमींना 50 हजार रुपये देण्याची घोषणा करण्यात आली होती.