देशात पेट्रोल आणि डिझेलच्या दरात पुन्हा एकदा वाढ झाल्याने सर्वसामान्यांच्या खिशावर मोठा ताण आला आहे. पश्चिम आशियातील वाढता तणाव, तसेच आंतरराष्ट्रीय बाजारात कच्च्या तेलाच्या वाढत्या किमती यामुळे सरकारी तेल कंपन्यांनी इंधन दरात प्रति लिटर ३ रुपयांची वाढ केली आहे. या निर्णयाचा थेट परिणाम दिल्ली, मुंबईसारख्या प्रमुख शहरांतील नागरिकांवर झाला असून, आधीच महागाईने त्रस्त असलेल्या लोकांसाठी ही वाढ आणखी डोकेदुखी ठरत आहे.मात्र, या सर्व परिस्थितीत देशात एक असे ठिकाण आहे जिथे पेट्रोल आणि डिझेल तुलनेने स्वस्त दरात मिळत आहे. ते शहर कोणतं आहे, तुम्हाला माहिती आहे का? जाणून घ्या

अंदमान आणि निकोबार बेटांची राजधानी पोर्ट ब्लेअर येथे इंधनाचे दर इतर महानगरांच्या तुलनेत १० ते १५ रुपयांनी कमी आहेत. सध्या पोर्ट ब्लेअरमध्ये पेट्रोलचा दर सुमारे ८४.९९ रुपये प्रति लिटर असून डिझेलची किंमत ८०.६४ रुपये आहे. ही दररचना देशातील इतर भागांतील ग्राहकांसाठी आश्चर्यकारक ठरत आहे.

पोर्ट ब्लेअरमध्ये इंधन स्वस्त असण्यामागे मुख्य कारण म्हणजे कमी कर आणि व्हॅट दर. अनेक राज्य सरकारे महसूल वाढवण्यासाठी पेट्रोल-डिझेलवर जास्त कर लावतात, तर केंद्रशासित प्रदेशांमध्ये तुलनेने कमी कर आकारला जातो. त्यामुळे ग्राहकाला इंधन स्वस्त मिळते. याशिवाय स्थानिक धोरणांमुळेही दर नियंत्रणात राहतात.

या दरवाढीचा परिणाम केवळ वाहनचालकांपुरता मर्यादित राहत नाही. वाहतूक खर्च वाढल्याने अन्नधान्य, भाजीपाला, फळे आणि इतर जीवनावश्यक वस्तूंच्या किमतीतही वाढ होण्याची शक्यता असते. त्यामुळे महागाईचा फटका सर्वसामान्य नागरिकांना बसतो. विशेषतः मध्यमवर्गीय कुटुंबांवर याचा मोठा परिणाम दिसून येतो. तज्ज्ञांच्या मते, जर आंतरराष्ट्रीय बाजारात कच्च्या तेलाच्या किमती आणखी वाढल्या, तर देशातील इंधन दर पुन्हा वाढू शकतात. अशा परिस्थितीत महागाई अधिक वाढली जाण्याची शक्यता आहे.