• लोकसभेमध्ये राहुल गांधी पुन्हा आक्रमक

• नीट पेपरफुटी प्रकरण, आंदोलनावरून सरकारला खडेबोल सुनावले

• परीक्षा सुधारणा विधेयकावरील चर्चेदरम्यान सरकारवर पेपर लीक आणि शिक्षण व्यवस्थेवरून हल्लाबोल

• इडियट आणि अंधभक्त या शब्दांवरून लोकसभेत सत्ताधारी आणि विरोधकांमध्ये गदारोळ

विरोधी पक्षनेते राहुल गांधी यांनी आज लोकसभेमध्ये सुरू असलेल्या परीक्षा सुधारणा विधेयकावरील चर्चेत भाग घेतला. त्यांनी यावेळी नीट पेपरफुटी प्रकरणी, विद्यार्थी आंदोलन यावरून मोदी सरकारला चांगलेच धारेवर धरले. लोकसभेत बोलताना राहुल गांधी यांनी एका विद्यार्थिनीसोबतच्या संभाषणाचा संदर्भ देत विद्यार्थी, इडियट आणि अंधभक्त या ३ कॅटेगरीचे वर्णन केले. राहुल गांधींच्या या भाषणानंतर सभागृहामध्ये सत्ताधारी आक्रमक झाले.

राहुल गांधी यांनी सांगितले की, 'मी विचार केला की यात इडियट (मूर्ख) सुद्धा आहेत आणि विद्यार्थी सुद्धा आहेत. मी विचारले की ही तिसरी कॅटेगरी कुठे जाते? तर ती म्हणजे अंधभक्त. अशा तीन कॅटेगरी आहेत. जे विद्यार्थी आहेत ते शिक्षण व्यवस्थेबद्दल बोलत आहेत. ते दररोज ८ ते १० तास अभ्यास करतात. शिक्षण खूप महाग झाले आहे आणि ते वर्षानुवर्षे मेहनत करतात. '

राहुल गांधी विद्यार्थी आंदोलनावर करण्यात आलेल्या लाठीचार्जवरून चांगलेच संतापले. ते म्हणाले की, 'संपूर्ण देशाला विद्यार्थ्यांच्या भावना समजतात. भाजपने या विधेयकावर आपल्या विद्यार्थ्यांची संमती घेतली पाहिजे. विद्यार्थ्यांची आंदोलने राग आणि द्वेषातून प्रेरित नव्हती. देशातील तरुणांना रस्त्यावर उतरणे भाग होते. संपूर्ण देशाला विद्यार्थ्यांच्या भावना समजल्या होत्या. महत्वाचे म्हणजे विद्यार्थ्यांचा संताप रास्त होता.'

राहुल गांधींच्या या विधानावर सत्ताधारी पक्षाच्या खासदारांनी जोरदार गदारोळ केला आणि तीव्र आक्षेप घेतला. राहुल गांधी असंसदीय शब्द वापरत आहेत. ते एका विद्यार्थिनीच्या उदाहरणाचा संदर्भ देत असा शब्द बोलत आहेत. हा शब्द कामकाजातून काढून टाकला पाहिजे. यावर लोकसभा अध्यक्षांनी सांगितले की, 'जे शब्द असंसदीय असतील, ते कामकाजातून काढून टाकले जातील.'

राहुल गांधी पुढे म्हणाले, 'मी इडियट या शब्दाऐवजी दुसरा शब्द वापरतो.' त्यावर अध्यक्षांनी स्पष्ट केले की, 'तुम्हाला यावर निर्णय देण्याची गरज नाही, मी यावर निर्णय दिला आहे.' त्यानंतर राहुल गांधी पुढे म्हणाले, 'विद्यार्थी सजग आहेत आणि त्यांना सत्य ठाऊक आहे. एका परीक्षेवर शिक्षण बजेटपेक्षा जास्त खर्च होतो, तर अंधभक्त मूर्खालाच देव मानतात.'

लोकसभेत परीक्षा विधेयकावर चर्चा सुरू असताना राहुल गांधींच्या भाषणावेळी गदारोळ झाला. इडियट शब्दावरून सत्ताधाऱ्यांनी गोंधळ घातला होता. त्यानंतर राहुल गांधी यांनी भाषण थांबवले होते. त्यानंतर काहीवेळानंतर लोकसभा अध्यक्षांनी राहुल गांधींना भाषण सुरू ठेवण्यास सांगितले. अध्यक्ष म्हणाले, जर तुम्हाला बोलायचे नसेल, तर मी पुढच्या वक्त्याला बोलावू? याच सभागृहात विरोधी पक्षाने सभागृह नेत्यांना न बोलू दिल्याचे प्रसंग आम्ही आधीही पाहिले आहेत.

केंद्रीय मंत्री किरेन रिजेजू म्हणाले, सभागृहात चांगली चर्चा सुरू आहे, तुम्ही असा गोंधळ निर्माण करू नका. विरोधी पक्षाने यापूर्वी अनेकदा पंतप्रधानांना बोलू दिलेले नाही. आज तुम्ही असंसदीय भाषेचा वापर केला असून तुमच्या शब्दावर आमचा आक्षेप आहे. भावनिक चेहरा दाखवून तुम्ही देशवासीयांची दिशाभूल करू शकत नाही.

यावर राहुल गांधी म्हणाले, 'मी इडियट हा शब्द कोणा एका व्यक्तीसाठी वापरलेला नाही, तर फक्त एक वर्ग/कॅटेगरी सांगितली आहे. जर तुम्हा सर्वांना असे वाटत असेल की सभागृहात फक्त भाजपनेच बोलावे, तर मी गप्प बसतो आणि खाली बसतो. मला काहीच अडचण नाही. मी जेव्हा जेव्हा बोलायला उभा राहतो तेव्हा रिजेजूजी मध्येच उभे राहतात आणि अध्यक्ष त्यांना संधी देतात.

लोकसभा अध्यक्ष म्हणाले, 'सभागृहात नेहमीच चांगल्या परंपरा आणि मर्यादा राहिल्या आहेत. आपण सर्वांनी या मर्यादा जपल्या पाहिजेत. जो नेता तर्काने आणि मर्यादेत राहून बोलतो, देश त्याचे ऐकतो आणि आदर करतो. त्यामुळे शब्दांची निवड ही संसदीय मर्यादेला धरूनच असावी.'