रोहित कदम, साम प्रतिनिधी

नीट पेपरफुटीचा मुद्दा देशभरात गाजत असताना एक धक्कादायक माहिती समोर आलीय. देशभरात विविध राज्यांमधल्या परीक्षांचे पेपर ज्यांनी फोडले ते जेलमध्ये असायला हवे होते. मात्र हे पेपर फोडणारे माफिया चक्क आमदार झाले आहेत. हो तुम्हाला हे ऐकून धक्का बसेल. पेपरफुटीतले काही आरोपी चक्क आमदार बनून स्वतःला जनतेचे सेवक म्हणवून घेत आहेत. पाहूयात आमदार बनून उजड माथ्यानं फिरणारे हे महाभाग कोण आहेत पाहूयात.

पेपरफुटी प्रकरणातील पहिले आरोपी बेदी राम उत्तर प्रदेशातील सुहेलदेव भारतीय समाज पार्टी(SBSP)चे आमदार आहेत. आमदार बेदी राम यांच्यावर उत्तर प्रदेश व्यतिरिक्त राजस्थान आणि मध्य प्रदेश या राज्यांमध्येही पेपर लीक केल्याचा आरोप आहे. विशेष म्हणजे, बेदी राम यांच्या पक्षाचा सत्ताधारी भाजपला पाठिंबा आहे.

तर दुसरे आरोपी आहेत विपुल दुबे हे सध्या उत्तर प्रदेशातील ग्यानपूर मतदारसंघातून निषाद पार्टीचे आमदार आहेत. विपुल दुबे यांच्यावर 2006 मधील रेल्वे भरती परीक्षेचा पेपर लीक केल्याचा आरोप आहे. या आरोपांनंतर गँगस्टर अॅक्ट अंतर्गत कारवाई करण्यात आली होती. मात्र पेपरफुटीतले शेकडो आरोपी अजूनही मोकाटच आहेत. गेल्या 10 वर्षांत 152 पेक्षा जास्त पेपर फुटूनही आतापर्यंत एकाही दोषीला शिक्षा झालेली नसल्याचा आरोप राहुल गांधींनीही केलाय.

त्यामुळे प्रश्न फक्त पेपरफुटीचा नाहीये, तर इथल्या व्यवस्थेचा आहे. ​जर पेपरफुटी प्रकरणांमध्ये योग्य न्याय मिळत नसेल, आरोपी जामिनावर सुटून यंत्रणाच ताब्यात घेणार असतील तर विद्यार्थ्यांचं भवितव्य कसं सुरक्षित राहणार?, हाच खरा प्रश्न आहे.