संपूर्ण देशभरात गणेशोत्सव मोठ्या उत्साहात साजरा केला जातोय. ठिकठिकाणी लाडक्या बाप्पाची मनोभावे सेवा केली जातेय. मात्र पाकिस्तानातही गणेशोत्सवाचा जल्लोष पाहायला मिळतोय. भारत-पाकिस्तान फाळणीच्या 79 वर्षानंतरही कराचीतल्या एका मराठी कुटुंबानं गणेशोत्सव साजरा करण्याची संस्कृती आणि परंपरा मोठ्या उत्साहानं जपलीये. फाळणीच्या वेळी पाकिस्तानातच थांबलेल्या अमर प्रकाश यांचं कुटुंब भारतात 2002 सालापासून अत्यंत उत्साहात गणेशोत्सव साजरा करतंय. गेली 25 वर्षांपासून सुरू असलेल्या गणेशोत्सवाची खास गोष्ट काय आहे?... तेही पाहूयात...

कराचीतील अमर प्रकाश यांच्या कुटुंबानं गणेश मठ मंदिराची पुनर्बांधणी केली. 2002 पासून अमर प्रकाश गणेश चतुर्थी साजरी करत आहेत. मंदिरातील ही एकसंध संगमरवरी गणपतीची मूर्ती 2008 मध्ये पुण्यातील पिंपरीहून पाकिस्तानात नेण्यात आली. सुमारे 80 किलो वजनाची ही मूर्ती दरवर्षी गणेशोत्सवात विराजमान होते. यंदा 7 दिवसांचा गणेशोत्सव साजरा केला जातोय. विशेष म्हणजे, बाप्पाच्या मूर्तीचं रंगकाम पाकिस्तानातील मुस्लीम कलाकारानं केलंय.

विशेष म्हणजे, अजानच्यावेळी ढोल-ताशांचा गजर थांबवून इतर धर्मांप्रती आदरही राखला जातो. समाजात सकारात्मकता, प्रेम आणि ऐक्य वाढावे हाच या उत्सवामागील मुख्य उद्देश असल्याचंही अमर प्रकाश सांगतात. खरंतर, ‘श्री महाराष्ट्र पंचायत’सारख्या संस्था आजही तेथील मराठी संस्कृती जपण्यासाठी काम करत आहेत. तर दुसरीकडे, अमर प्रकाश यांनी मराठी संस्कृती जपणाऱ्या गणेशोत्सव आणि इतर हिंदू सणांचे अनेक व्हिडीओ शेअर केले आहेत. त्यामुळे पाकिस्तानसारख्या मुस्लीमबहुल देशात हिंदू सण आणि संस्कृती जपणारं मराठी कुटुंब भारतात चर्चेचा विषय ठरलंय. देश बदलला, पिढ्या बदलल्या… मात्र, अमर प्रकाश यांची बाप्पाशी आणि आपल्या संस्कृतीशी जोडलेली नाळ मात्र आजही कायम आहे...