Crime : एका कंटेंट क्रिएटरचा तिच्या घरात संशयास्पद परिस्थितीत मृत्यू झाल्याची माहिती समोर आली आहे. या प्रकरणामध्ये पोलिसांनी दोघांना ताब्यात घेतले आहेत. या कंटेंट क्रिएटरचे टिकटॉकवर ५८,००० फॉलोअर्स आहेत. तिची मुलगी देखील सोशल मीडियावर सक्रीय आहे. ही घटना पाकिस्तानच्या सिंध प्रांतातील घोटकी जिल्ह्यात घडली आहे.

मिळालेल्या माहितीनुसार, टिकटॉक स्टार आणि कंटेंट क्रिएटर सुमिरा राजपूतचा तिच्या घरात मृत्यू झाला. काही लोक सुमिराला लग्न करण्यासाठी भाग पाडत होते. तिने नकार दिल्याने विषारी गोळ्या देऊन तिला मारण्यात आले, असा दावा सुमिरा राजपूतच्या १५ वर्षीय मुलीने केला आहे. सुमिरा राजपूत ही पाकिस्तानमधील प्रसिद्ध कंटेंट क्रिएटर आहे. सुमिरा आणि तिच्या बहिणीचे मिळून १ लाखांहून अधिक फॉलोअर्स आहेत. सुमिरा राजपूत मृत्यू प्रकरणामध्ये पोलिसांनी दोघांना ताब्यात घेतले असले तरीस अद्याप कोणताही एफआयआर नोंदवण्यात आलेला नाही.

गेल्या महिन्यामध्ये पाकिस्तानमध्ये १७ वर्षीय सोशल मीडिया इन्फ्लूएन्सर सना युसूफची इस्लामाबादमधील तिच्या घरात गोळ्या झाडून हत्या करण्यात आली होती. सना युसूफची हत्या करणारा तरुण गरीब होता. फक्त मॅट्रिकची परीक्षा पास झालेल्या या तरुणाने सनाला अनेकदा लग्नाची मागणी घातली होती. पण तिने प्रत्येक वेळी नकार दिला होता. यावरुन आरोपीने सनावर गोळी झाडल्या होत्या.

पाकिस्तानमध्ये ऑनर किलिंगच्या वाढत्या घटना

इस्लामाबादस्थित स्वतंत्र संस्था सस्टेनेबल सोशल डेव्हलपमेंट ऑर्गनायझेशन म्हणजेच एसएसडीओनुसार, २०२४ मध्ये देशभरात ३२ हजारांपेक्षा अधिक लैंगिक हिंसाचाराची प्रकरणे नोंदवण्यात आली आहेत. यापैकी ५४७ ऑनर किलिंगची प्रकरणे होती. या आकडेवारीवरुन पाकिस्तानमध्ये ऑनर किलिंगचे प्रमाण वाढत असल्याचे पाहायला मिळत आहे.