Om Prakash Rajbhar latest news : उत्तर प्रदेशचे कॅबिनेट मंत्री ओमप्रकाश राजभर यांच्या अडचणीत मोठी वाढ झाली आहे. भाजप कार्यकर्त्यांना मारहाण करण्याची आणि त्यांना जीवे मारण्याची धमकी दिल्याप्रकरणी न्यायालयाने त्यांच्याविरोधात अजामीनपात्र वॉरंट (Non-Bailable Warrant) जारी केले आहे. मऊ जिल्ह्यातील २०१० लोकसभावेळी झालेल्या जुन्या प्रकरणात न्यायालयाने ही कठोर कारवाई केली. कोर्टाच्या या निर्णायामुळे उत्तर प्रदेशच्या राजकीय वर्तुळात मोठी खळबळ उडाली आहे.

उत्तर प्रदेशमधील मऊच्या न्यायालयाने कॅबिनेट मंत्री ओम प्रकाश राजभर यांच्या विरोधात अजामीनपात्र वॉरंट जारी केले. मुख्य न्यायदंडाधिकारी डॉ. कृष्ण प्रताप सिंह यांनी भाजप कार्यकर्त्यांना शिवीगाळ केल्याप्रकरणी आणि चपलेने मारण्याची धमकी दिल्याप्रकरणी हे वॉरंट जारी केल्याची माहिती एनबीटीने दिली आहे.

२०१९ च्या लोकसभा निवडणुकीदरम्यान आचारसंहितेचे उल्लंघन केल्याबद्दल ओम प्रकाश राजभर यांच्या विरोधात गुन्हा दाखल करण्यात आला होता. लोकसभा निवडणूक प्रचारावेळी रतनपुरा बाजार येथील एका जाहीर सभेत ओम प्रकाश राजभर यांनी भाजप नेत्यांविरुद्ध कथितरित्या अपमानजनक वक्तव्य केले होते. स्टेजवरून राजभर यांनी भाजप नेत्यांना चपलेने मारण्याची धमकी दिल्याचा त्यांचावर आरोप आहे. भाजपच्या एका नेत्याने या प्रकरणी कोर्टात धाव घेतली होती.

ओम प्रकाश राजभर यांना कोर्टाने अनेकदा हजर राहण्याचे समन्स बजावले होते. पण राजभर कोर्टात हजर राहिले नाहीत. त्यामुळे न्यायाधिशांनी भूमिका घेत अजामीनपात्र वॉरंट जारी केले आहे. समन्स बजावूनही ते हजर न राहणे हा न्यायालयाचा अवमान आहे, असे न्यायालयाने वॉरंट काढता म्हटले. दरम्यान, अजामीनपात्र वॉरंटमध्ये आरोपीला तात्काळ जामीन मिळत नाही. पोलिसांना आरोपीला अटक करून थेट न्यायालयासमोर हजर करण्याचे निर्देश दिले जातात. आरोपी न्यायालयासमोर हजर झाल्यानंतरच पुढील कार्यवाही केली जाते.