Summary -

• लग्नानंतर अवघ्या १० व्या दिवशी बायकोने नवऱ्याच्या अंगावर उकळते तेल ओतले

• नवरा गंभीर जखमी झाला असून त्याच्यावर रुग्णालयात उपचार सुरू

• पत्नीला पोलिसांच्या ताब्यात देण्यात आले

• हल्ल्याचे नेमके कारण अद्याप अस्पष्ट

बिहारमध्ये एका महिलेने आपल्या नवऱ्याच्या अंगावर उकळतं तेल ओतलं. लग्नाच्या दहाव्या दिवशी तिने हे भयंकर कृत्य केले. शिवहर जिल्ह्यातल्या पिपराही पोलिस ठाण्याच्या हद्दीतील मीनापूर बाघा गावात ही घटना घडली. नवविवाहित महिलेने नवरा मोहम्मद मुन्ना याच्या अंगावर उकळते तेल ओतले. या घटनेत मोहम्मद गंभीर जखमी झाला असून त्याच्यावर रुग्णालयात उपचार सुरू आहेत.

मिळालेल्या माहितीनुसार, ३ फेब्रुवारीला मोहम्मद मुन्नाचे एका तरुणीसोबत थाटामाटात लग्न झाले. लग्नानंतर तो बायकोला घेऊन घरी आला. पण त्याच्या बायकोला त्याचे जवळ येणं अजिबात आवडत नव्हते. लग्नापासूनच त्यांच्यामध्ये तणावाचे वातावरण होते. तिने रागाच्या भरात नवऱ्यावर जीवघेणा हल्ला केला. तिने ५ लिटर उकळते तेल आपल्या नवऱ्याच्या अंगावर ओतले. या हल्ल्यात मोहम्मद गंभीर जखमी झाला आहे. त्याच्यावर सध्या मुझफ्फरपूर येथील श्रीकृष्ण मेडिकल कॉलेज हॉस्पिटलमध्ये उपचार सुरू आहेत. त्याची प्रकृती चिंताजनक आहे.

मोहम्मद मुन्नाच्या कुटुंबीयांनी सांगितले की, लग्नापासूनच घरामध्ये तणावाचे वातावरण होते. लग्न झाल्यापासून मोहम्मदची बायको विचित्र वागत होती. ती मोहम्मदला तिच्या खोलीत झोपून देखील देत नव्हती. लग्न झाल्यापासून ती मोहम्मदला जवळ येऊन देत नव्हती. एक दिवस तिने मोहम्मदला खोलीबाहेर बंद केले. वाद सोडवण्यासाठी त्याच्या बायकोच्या कुटुंबीयांना बोलावण्यात आले. दोघांचीही समजूत काढण्यात आली. त्याच्या दुसऱ्या दिवशीच तिने मोहम्मदसोबत भयंकर कृत्य केले.

मोहम्मद मुन्ना आपल्या खोलीत झोपला होता. त्याचवेळी त्याची बायको स्वयंपाक घरात गेली. तिने चुलीवर सुमारे ५ लिटर मोहरीचे तेल उकळायला ठेवले. तेल पूर्णपणे उकळल्यानंतर ती ते घेऊन मोहम्मदच्या जवळ गेली. त्यानंतर तिने हे उकळते तेल झोपलेल्या मोहम्मदच्या अंगावर ओतले. त्यानंतर तो जोरजोरात ओरडू लागला. कुटुंबातील सदस्य त्याच्या खोलीकडे धावले. मोहम्मदची अवस्था पाहून ते प्रचंड घाबरले. तो वेदनेने तडफडत होता.

मोहम्मदचे कुटुंबीय आणि शेजाऱ्यांनी त्याच्या बायकोला पकडले आणि पोलिसांच्या स्वाधीन केले. त्यानंतर त्यांनी मोहम्मदला तात्काळ रुग्णालयात उपचारासाठी दाखल केले. मोहम्मदची प्रकृती चिंताजनक आहे. त्याच्यावर उपचार सुरू आहेत. या घटनेमुळे मोहम्मदच्या कुटुंबीयांना मोठा धक्का बसला. पोलिस सध्या या प्रकरणाचा तपास करत आहेत. मोहम्मदच्या बायकोने हे कृत्य का केले यामागचे कारण पोलिस तपासत आहेत.