प्रमोद जगताप

NCP Political News:

अजित पवार आणि त्यांचे समर्थक आमदार शिंदे सरकारमध्ये सहभागी झाल्याने राष्ट्रवादीत फूट पडली आहे. राष्ट्रवादीत फूट पडल्यानंतर अजित पवारांनी पक्षावर दावा केल्यानंतर राष्ट्रवादीच्या शरद पवार गटाने कायदेशीर लढाई लढण्याचा मार्ग स्वीकारत सुप्रीम कोर्टात याचिका दाखल केली आहे. (Latest Marathi News)

अजित पवारांनी पक्षावर दावा केल्यानंतर शरद पवार गटाने सुप्रीम कोर्टात धाव घेतली आहे. सुप्रीम कोर्टात धाव घेत अजित पवारांसोबतच्या आमदारांवर कारवाई करण्याची मागणी करत शरद पवार गटाने याचिका दाखल केली आहे.

राष्ट्रवादीचे प्रदेशाध्यक्ष जयंत पाटील यांनी सुप्रीम कोर्टात याचिका दाखल केली आहे. अजित पवार यांच्यासोबत गेलेल्या आमदारांवर कारवाई करावी, यासाठी कोर्टाने विधानसभा अध्यक्षांना सूचना द्यावात, अशी मागणी याचिकेत करण्यात आलेली आहे. राष्ट्रवादीचे प्रदेशाध्य जयंत पाटील यांनी दाखल केलेल्या याचिकेवर ९ ऑक्टोबरला सुनावणी होणार आहे.

केंद्रीय निवडणूक आयोगासमोर सुनावणी

तत्पूर्वी, राष्ट्रवादीत फूट पडल्यानंतर अजित पवार गटाने केंद्रीय निवडणूक आयोगाकडे काही हजार कागदपत्रे आणि पतिज्ञापत्रे सादर केली आहेत. अजित पवार गटानंतर शरद पवार यांच्या पक्षानेही आठ ते ९ हजार कागदपत्रे आयागाकडे दिली आहेत.

तसेच आज पक्ष आणि चिन्हाबाबत आज निवडणूक आयोगावर सुनावणी होणार आहे. या सुनावणीत एकाच गटाला बाजू मांडायची वेळ दिली जाण्याची शक्यता आहे. सायंकाळी ४ ते ६ या दोन तासांच्या कालावधीत एकाच गटाला म्हणणं मांडावं लागणार आहे. तर दुसऱ्या तारखेला दुसऱ्या गटाला म्हणणं मांडण्याची संधी दिली जाण्याची शक्यता आहे.

केंद्रीय निवडणूक आयोगासमोर होणाऱ्या सुनावणीत राष्ट्रवादीचे अध्यक्ष शरद पवार उपस्थित राहण्याची शक्यता आहे. पक्षाचे नाव आणि चिन्ह कोणत्या गटाला मिळणार, याबाबत सुनावणी होणार आहे.