Myanmar Army Soldier

गृहयुद्धामुळे म्यानमारमधील परिस्थिती चिघळली आहे. एका सशस्त्र गटाने शनिवारी हल्ला करून सैन्य तळ ताब्यात घेतल्यामुळे म्यानमारचे १५१ सैनिक भारताच्या आश्रयाला आले आहेत. काही महिन्यांपूर्वीच सीमेलगतच्या हजारो नागरिकांनी भारतात आश्रय घेतला होता. मिझोरामच्या लांगतलाई जिल्ह्यात या सैनिकांनी शरण घेतली असून आसाम रायफल्सने त्यांना ताब्यात घेतलं आहे.

म्यानमारचं लष्कर आणि अरकान बंडखोरांच्या सैनिकांमध्ये मोठ्या प्रमाणात चकमकी झडत आहेत. शुक्रवारी मिझोराममध्ये घुसलेले काही सैनिक गंभीर जखमी झाले आहेत. त्यांच्यावर आसाम रायफलच्या जवानांनी उपचार केले आहेत. त्यांना परवा येथे आसाम रायफल्सच्या सुरक्षित कोठडीत ठेवण्यात आलं आहे. भारताचे परराष्ट्र मंत्रालय आणि म्यानमारचे सरकार याच्यात चर्चा सुरू असून म्यानमारच्या सैनिकांना लवकरच मायदेशात पाठवण्यात येईल, अशी माहिती लष्करी अधिकाऱ्यांनी दिली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

नोव्हेंबच्या सुरुवातीला देखील पीपल्स डिफेन्स फोर्सने म्यानमार भारत सीमेवरील लष्करी छावण्यांवर हल्ले करत ताबा मिळवला होता. त्यावेळी १०४ सैनिक भारतात आश्रयासाठी आले होते. पोलिसांनी दिलेल्या प्राथमिक माहितीनुसार, पारावाजवळील म्यानमारच्या लष्करी तळावर गुरुवारी म्यानमार पीपल्स आर्मी आणि चीन नॅशनल आर्मीने हल्ला करत लष्करी छावण्या ताब्यात घेतल्या होत्या. त्यानंतर सैनिकांनी तेथून पळ काढला. आंतरराष्ट्रीय सीमा ओलांडून टुयसेंटलॉंग गावात ते पोहोचले. तेथून आणखी काही सैनिक भारतात दाखल झाले आहेत.