नवी दिल्ली : उत्तर प्रदेशचे माजी मुख्यमंत्री आणि सपाचे ज्येष्ठ नेते मुलायम सिंह यादव (Mulayam Singh Yadav) यांची प्रकृती अचानक बिघडली आहे. त्यांना गुरुग्राममधील मेदांता रुग्णालयात दाखल करण्यात आले आहे.

मुलायम सिंह यांना आयसीयूमध्ये हलवण्यात आले आहे. डॉक्टर त्यांच्या प्रकृतीवर सातत्याने लक्ष ठेवून आहेत. अखिलेश यादव देखील (Akhilesh Yadav) लखनौहून दिल्लीला रवाना झाले आहेत. शिवपाल सिंह यादव हे देखील दिल्लीत आहेत. मेदांता हॉस्पिटलमध्ये डॉ. सुशीला कटारिया यांच्या देखरेखीखाली त्यांच्यावर उपचार सुरू आहेत. (National News)

यादव कुटुंबीय दिल्लीला पोहोचू लागले आहेत. घरातील सदस्य एकापाठोपाठ एक येत असल्याने त्यांची प्रकृती चिंताजनक असल्याचे बोलले जात आहे. मुलायमसिंह यादव हे बऱ्याच दिवसांपासून मेदांता रुग्णालयात दाखल आहेत. गेल्या वर्षीही त्यांना पोटदुखीमुळे मेदांता रुग्णालयात दाखल करण्यात आले होते.

आजारपणामुळे मुलायम सिंह हे राजकारणातही सक्रिय नाहीत. मात्र उत्तर प्रदेशमधील निवडणुकीदरम्यान ते सपा नेत्यांना प्रोत्साहन देताना दिसले. त्याचबरोबर अखिलेश यादवही त्यांच्या प्रकृतीची विशेष काळजी घेतात.

सूत्रांकडून मिळालेल्या माहितीनुसार, संध्याकाळी 7:30 च्या सुमारास मुलायम सिंह यादव यांचे हेल्थ बुलेटिन जारी केले जाऊ शकते, ज्यामध्ये त्यांच्या आरोग्याची स्थिती स्पष्ट होऊ शकते. समाजवादी पार्टीच्या कार्यकर्त्यांच्या नजरा आता हेल्थ बुलेटिनकडे लागल्या आहेत.