Madhya Pradesh Crime News मध्य प्रदेशातील खंडवा जिल्ह्यातील खालवा पोलीस ठाण्याच्या हद्दीत नात्याला काळिमा फासणारी एक घटना उघडकीस आली आहे. एका ३० वर्षीय विवाहित महिलेने आपल्या दिरावर ब्लॅकमेल करून वारंवार अत्याचार केल्याचा गंभीर आरोप केला आहे. महिलेच्या तक्रारीवरून पोलिसांनी गुन्हा दाखल करून पुढील तपास सुरू केला आहे. या घटनेने परिसरात खळबळ उडाली आहे.

पोलिसांनी दिलेल्या माहितीनुसार, आरोपी हा पीडित महिलेचा दीर असल्याचं पोलीस तपासात समोर आलं आहे. काही दिवसांपूर्वी तो दोन दिवसांसाठी महिलेच्या घरी राहण्यासाठी आला होता. याच काळात त्याने महिलेचा आंघोळ करतानाचा व्हिडिओ तिच्या नकळत मोबाईलमध्ये काढला. त्यानंतर आरोपीने हा व्हिडिओ सोशल मीडियावर व्हायरल करण्याची तसेच नातेवाईकांना पाठवण्याची धमकी देत महिलेला मानसिक त्रास द्यायला सुरुवात केली.

पीडितेच्या म्हणण्यानुसार, बदनामीची भीती आणि कुटुंबामुळे ती बराच काळ गप्प राहिली. मात्र आरोपीने या परिस्थितीचा गैरफायदा घेत वारंवार तिच्यावर लैंगिक अत्याचार केल्याचा आरोप करण्यात आला आहे. अत्याचार आणि मानसिक छळ असह्य झाल्यानंतर महिलेने धाडस दाखवत खालवा पोलीस ठाण्यात तक्रार दाखल केली.

तक्रारीनंतर पोलिसांनी आरोपीविरुद्ध बलात्कारासह संबंधित कलमांनुसार गुन्हा नोंदवला आहे. सध्या आरोपी फरार असून आहे. पोलिस अधिकाऱ्यांनी सांगितले की, या प्रकरणाची चौकशी केली जात आहे. पीडित महिलेचे जबाब नोंदवण्यात आले असून पुढील कायदेशीर प्रक्रिया सुरू आहे. या घटनेमुळे परिसरात खळबळ उडाली असून आरोपीवर कठोर कारवाई करण्याची मागणी नागरिकांकडून होत आहे.