मध्य प्रदेशातील इंदूर-अहमदाबाद राष्ट्रीय महामार्गावर बुधवारी रात्रीच्या सुमारास भीषण अपघात झाला. एका अज्ञात वाहनाने बोलेरो कारला जोरदार धडक दिली. या अपघातात कारमधील ८ जणांचा जागीच मृत्यू झाला, तर एक गंभीर जखमी झाल्याची माहिती आहे.

मृतांमध्ये एक पोलीस कॉन्स्टेबल आणि एका महिलेसह ८ जणांचा समावेश आहे. जखमीला उपचारासाठी रुग्णालयात दाखल करण्यात आलं आहे. मृतांची ओळख पटवण्याचे काम सुरू आहे. अपघातानंतर अज्ञात वाहनचालक घटनास्थळावरून फरार झाला आहे.

पोलिसांकडून त्याचा शोध घेतला जात आहे. या घटनेनं परिसरातून हळहळ व्यक्त होत आहे. पोलिसांनी दिलेल्या माहितीनुसार, अपघातात मृत्युमुखी पडलेले सर्व लोक गुना जिल्ह्यातील रहिवासी आहेत. बुधवारी (ता. १५) ते कारने अलीराजपूरच्या बोरी गावात एका कार्यक्रमासाठी गेले होते.

कार्यक्रम आटोपून परतत असताना रात्री उशिरा घाटबिलोड येथे अज्ञात कारला धडक दिली. या अपघातात ८ जणांचा जागीच मृत्यू झाला. अपघातानंतर आरडाओरडा ऐकून आजूबाजूचे लोक जमा झाले आणि त्यांनी बचावकार्य केले.

अपघाताची माहिती मिळताच पोलीस आणि प्रशासनाचे पथक घटनास्थळी पोहोचले. रुग्णवाहिकेतून मृतदेह बेटमा रुग्णालयात आणण्यात आले. मृतांची नावे अद्याप समोर आलेली नसून पोलिसांकडून ओळख पटवणे सुरू आहे.