मध्य प्रदेशातील रीवा येथून पती पत्नीच्या नात्याला काळीमा फासणारी घटना उघडकीस आली आहे. हुंड्याची मागणी पूर्ण न झाल्याने नवऱ्यानं बायकोसोबतचे बेडरूममधील खासगी क्षण कॅमेऱ्यात कैद केले आहे. तसेच व्हिडिओ समाजमाध्यमांमध्ये व्हायरल केले आहे. याची माहिती मिळताच पीडित महिलेनं पोलीस ठाण्यात धाव घेतली. तसेच नवऱ्याविरोधात तक्रार दाखल केली. पीडितेच्या तक्रारीवरून पोलीस आता या प्रकरणाचा अधिक तपास करीत आहेत.

मिळालेल्या माहितीनुसार, ही संपूर्ण घटना रीवा जिल्ह्यातील समान पोलीस स्टेशन परिसरात घडली आहे. पतीकडून पत्नीवर वारंवार हुंड्यासाठी दबाव टाकला जात होता. तिच्यावर शारीरिक तसेच मानसिक छळ केला जात होता. त्यानं तिला मनाविरूद्ध लैगिंक संबंध ठेवण्यासही भाग पाडले. तसेच व्हिडिओही शूट करून शेअर केला.

या प्रकरणाबाबत माहिती देताना पीडितेनं सांगितलं की, लग्न होण्याआधीपासूनच सासरच्या मंडळीकडून हुंड्यासाठी छळ सुरू होता. तरूणीच्या कुटुंबियांना हुंडा देणं शक्य नव्हतं. त्यांनी असमर्थता देखील व्यक्त केली. दोघांचं लग्न झालं. लग्नाच्या काही दिवसांनंतर सासरच्या मंडळींकडून छळ सुरू होता.

दरम्यान, पीडित विवाहितेचा बेडरूममधील व्हिडिओ व्हायरल झाल्यानंतर तिने पोलीस ठाण्यात धाव घेतली. तिनं पोलिसांसमोर सासरच्या मंडळींचा खरा चेहरा समोर आणला. तसेच तक्रार दाखल करून पोलिसांसमोर न्यायाची मागणी केली. दरम्यान, पोलिसांनी पीडितेची तक्रार नोंदवून घेतली असून, तपास सुरू आहे.