Madhya Pradesh Election:

मध्य प्रदेशमध्ये भारतीय जनता पक्षाने (भाजप) चार याद्या जाहीर केल्या आहेत आणि निवडणुकीच्या शर्यतीत 136 उमेदवार उभे केले आहेत. काँग्रेसनेही रविवारी 144 उमेदवारांची नावे जाहीर केली आहेत. राज्यात 17 नोव्हेंबर रोजी विधानसभा निवडणुकीसाठी मतदान होणार आहे.

अशातच मध्य प्रदेशातील चंबळ भागात भाजपला मोठा धक्का बसला आहे. चार वेळा भाजपचे आमदार राहिलेल्या रसाल सिंह यांनी पक्षाचा राजीनामा दिला आहे.

मध्य प्रदेशातील निवडणुका जाहीर झाल्यामुळे भाजप-काँग्रेसमधील नाराज नेत्यांची पक्षांतराची प्रक्रिया सुरू आहे. राज्याची आणखी एक हाय प्रोफाईल जागा लाहार येथे विरोधी पक्षनेते गोविंद सिंग यांचा पराभव करण्यासाठी भाजपचे उमेदवार अंबरीश शर्मा यांच्या समर्थनार्थ मुख्यमंत्री स्वतः मैदानात उतरले आहेत. दरम्यान, तिकीट नाकारण्यात आल्याने नाराज झालेल्या भाजपचे माजी आमदार रसाल सिंह यांनी पक्षाच्या सदस्यत्वाचा राजीनामा दिला आहे. (Latest Marathi News)

राजीनाम्याबाबत नाराजी व्यक्त करताना माजी आमदार म्हणाले, 'भाजप संघटनेचा मेहनती कार्यकर्ता म्हणून मी माझे संपूर्ण आयुष्य समर्पित केले आहे. संस्थेच्या हितासाठी नेहमीच काम केले. मात्र पक्षाशी गद्दारी करणाऱ्या नेत्याला बढती देऊन आणि कोणाचेही न ऐकता निवडणुकीच्या रणधुमाळीत उतरवून संघटनेने पक्षातील लोकशाहीची हत्या केली आहे. अशातच मी त्यांच्यासाठी प्रचार करणे माझ्या स्वाभिमानाला न्याय देणारे ठरणार नाही.''

माजी आमदार रसाल सिंह यांनी आपल्या राजीनाम्याची प्रत सोशल मीडियावर अपलोड करून भाजप सोडल्याची माहिती सार्वजनिक केली आहे. दरम्यान, भाजपचे जिल्हाध्यक्ष देवेंद्र नरवरिया यांनी सांगितले की, लाहारमधील मुख्यमंत्री शिवराज सिंह चौहान यांच्या कार्यक्रमात त्यांनी रसाल सिंह यांचा राजीनामा त्यांच्या व्हॉट्सअॅपवर पाहिला होता. ते का नाराज आहे, याबाबत ते त्यांच्याशी चर्चा करतील. भाजप जिल्हाध्यक्षांच्या म्हणण्यानुसार, रसाल सिंह हे पक्षाचे ज्येष्ठ नेते आहेत, त्यांची मनधरणी करण्यासाठी सर्वतोपरी प्रयत्न केले जातील.