नवी दिल्ली : लष्कर-ए-तैयबाचा (Lashkar-e-Taiba) कमांडर नदीम अबरार (Nadeem Abrar) याला अटक करण्यात आली आहे. नदीम अबरार हत्येच्या अनेक गुन्ह्यांमध्ये सामील होता. नदीम अबरार हे आमच्यासाठी मोठे यश आहे. अशी माहिती आयजीपी काश्मीर विजय कुमार (IGP Kashmir Vijay Kumar) यांनी दिली आहे. (Lashkar-e-Taiba commander Nadeem Abrar arrested)

21 जून रोजी जम्मू-काश्मीरच्या सोपोरमधील (Sopor) बडगाम (Badgam) भागात पोलिस आणि सुरक्षा दलातील चकमकीत तीन दहशतवादी ठार झाले होते. य़ात लष्कर-ए-तैयबाचा दहशतवादी मुदासीर पंडित हादेखील ठार झाला. ही कारवाई सैन्याच्या 22-आरआर (राष्ट्रीय रायफल्स), सोपोर पोलिस आणि सीआरपीएफच्या 179-बटालियनने केली.

बडगाम जिल्ह्यातील नरबळ येथे नदीम अबरारला अटक करण्यात आली आहे. श्रीनगर-बारामुल्ला सीमेवरील अनेक हत्या आणि हल्ल्यांमध्ये तो सामील होता. सुरक्षा दलावरील हल्ल्यांमध्येही तो सहभागी होता. “आमच्यासाठी मोठे यश” असल्याचे मत काश्मीर विजय कुमार यांनी व्यक्त केले आहे.

याबाबत बोलताना कुमार यांनी माहिती दिली आहे. नदीम 2018 पासून दहशतवादी कारवायांमध्ये सामील होता. जम्मू-काश्मीरमधील सुरक्षा दलांवर आणि नागरिकांवर अनेक हल्ल्यांमध्ये तो सहभागी होता. ऑल्टो कारमध्ये जात असताना नदीमला श्रीनगरमध्ये अटक करण्यात आली. नदीमसह आणखी एकास अटक करण्यात आल्याची बातमीही आहे.

कुमार यांनी अटकेसंदर्भात अधिक माहिती दिली नाही, परंतु सुरक्षा दलाने शहराच्या बाहेरील परिमपुरा येथील चेक पोस्टवर अबरार व इतर संशयितांना अटक केल्याची माहिती सूत्रांनी दिली आहे. या वर्षाच्या सुरुवातीला लावेपुरा येथे केंद्रीय राखीव पोलिस दलाच्या तीन जवानांच्या हत्येमध्ये अबरारचा हात होता. अटक केलेल्या दहशतवाद्यांकडून सुरक्षा दलाने एक पिस्तूल आणि हँड ग्रेनेड जप्त केले आहेत.

Edited By -Anuradha Dhawade