हवामान बदलामुळे देशातील वातावरणात मोठा बदल झालाय. त्यातच प्रत्येकवर्षी तापमानात कमालीची घट होतेय. अवकाळी पाऊस, भूस्खलन अशा घटना वारंवार घडतायत.. लवकरच हिवाळ्याला सुरुवात होणार आहे. यंदा हाडं गोठवणारी थंडी पडणार असल्याची शक्यता तज्ज्ञांनी व्यक्त केलीय. जास्त थंडी पडण्यामागे कोणत्या गोष्टी कारणीभूत आहेत.. ते पाहूयात..

ला-नीना कार्यरत झाल्यामुळे तापमानात मोठी घट होऊ शकते. ऑक्टोबर ते डिसेंबर दरम्यान ला-नीना (La Niña) 71 टक्क्यांपर्यंत अॅक्टिव्ह राहण्याची शक्यता आहे. ला-नीना ही एक हवामान प्रक्रिया असून ला-नीनामुळे पूर्व पॅसिफिक महासागरातील समुद्राचे पाणी सामान्यपेक्षा थंड होते. यामुळे जागतिक हवामानावर परिणाम होतो. डिसेंबर 2025 ते फेब्रुवारी 2026 यादरम्यान La Niña चा प्रभाव कमी होऊन 54 टक्क्यांपर्यंत राहू शकतो. त्यामुळे हवामानात गारवा वाढणार आहे. जगातील हवामानाचा पॅटर्न बदलला असून भारतात दरवर्षीपेक्षा जास्त थंडी पडू शकते, असे तज्ज्ञांनी म्हटलेय.

ला- नीनाचा परिणाम फक्त पॅसिफिक महासागरापुरताच मर्यादित नाही, तर संपूर्ण जगाच्या हवामानावर याचा परिणाम होतो. भारतात ला-नीना फक्त हिवाळ्यामध्ये तापमान कमी-अधिक करतो. त्यामुळे हाडं गोठवारी थंडी पडण्याची शक्यता वर्तवली जातेय. मात्र त्यातच यंदा कमी कालावधीपुरता ला-नीनाचा प्रभाव पडण्याची शक्यताही काही तज्ज्ञांनी वर्तवलीय. त्यामुळे जर समुद्राच्या पृष्ठभागाचे तापमान -0.5 अंश सेल्सिअसपेक्षा खाली गेले आणि ही स्थिती सलग तीन महिने राहिली तर अधिकृतपणे ला-नीना प्रक्रिया घोषित केली जाईल. त्यामुळे थंडीला सामोरे जाण्याची तयारी आत्तापासून करुन ठेवा.