Summary -

• केरळमध्ये यूडीएफची स्पष्ट आघाडी

• काँग्रेसकडून ३ मुख्यमंत्रीपदाचे दावेदार चर्चेत

• एलडीएफला अपयश मिळताना दिसत आहे

• काँग्रेसमध्ये अंतर्गत स्पर्धा वाढण्याची शक्यता

केरळ विधानसभा निवडणुकीचा निकाल आज जाहीर होईल. या निकालाकडे संपूर्ण देशाचे लक्ष लागले आहे. मतमोजणी सुरू असून आतापर्यंत आलेल्या आकडेवारीनुसार केरळमध्ये काँग्रेसच्या नेतृत्वाखालील यूडीएफ पक्षाची विजयाच्या दिशेने वाटचाल सुरू आहे. १४० विधानसभा विधानसभा जागांपैकी १०० जागांवर यूडीएफ आघाडीवर आहे. तर भारतीय कम्युनिस्ट पक्षाच्या नेतृत्वाखालील सत्ताधारी डावी लोकशाही आघाडी असलेल्या एलडीएफ पक्षाला फक्त ४० जागांवर आघाडी मिळाली आहे. जर केरळमध्ये काँग्रेसच्या नेतृत्वाखालील आघाडी जिंकली तर मुख्यमंत्री काँग्रेसचाच होईल. काँग्रेसकडून ३ नेत्यांची नावं चर्चेत आहेत.

केरळमध्ये मुख्यमंत्रिपदाच्या शर्यतीमध्ये ३ प्रमुख नावं आघाडीवर आहेत. पहिले नाव व्ही.डी. सतीश, दुसरे नाव रमेश चेन्नीथला आणि तिसरे नाव के.सी. वेणुगोपाल यांचे आहे. हे तिघेही मुख्यमंत्रिपदासाठी प्रबळ दावेदार असल्याचे सांगत आहेत. काँग्रेस पक्षात देखील त्यांच्याच नावाची चर्चा सुरू आहे. के. सी. वेणुगोपाल यांनी ही निवडणूक लढवली नाही. हरिपाद मतदारसंघात रमेश चेन्नीथला ७,००० हून अधिक मतांनी आघाडीवर आहेत. तर परवूर मतदारसंघात व्ही. डी. सतीश यांनी सुमारे १,००० मतांची आघाडी घेतली आहे.

काँग्रेसमध्ये मुख्यमंत्रिपदावरून अंतर्गत वाद निर्माण होण्याची शक्यता आहे. यापूर्वी काँग्रेस पक्षात अंतर्गत लढाई ही राज्य नेत्यांपूरती मर्यादित होती. पण आता के.सी. वेणुगोपाल यांच्यासारख्या हायकमांडमधील एका प्रमुख नेत्याच्या प्रवेशाने प्रकरण अधिकच गुंतागुंतीचे झाले आहे. वेणुगोपाल हे काँग्रेसचे सरचिटणीस असून ते राहुल गांधींच्या अतिशय जवळचे मानले जातात. पूर्वी जेव्हा केंद्रात काँग्रेस सत्तेत होती तेव्हा अशा परिस्थिती हाताळणे सोपे होते. पक्षाचे हायकमांड ज्येष्ठ नेत्यांना केंद्र सरकारमध्ये महत्वाची पदं देऊन मनधरणी करायचे.