कर्नाटकाच्या राजकारणात पुन्हा उलथापालथ होण्याची शक्यता आहे. मुख्यमंत्री सिद्दारमैया यांनी काँग्रेसचे वरिष्ठ नेते राहुल गांधी यांची आज मंगळवारी भेट घेतली. या भेटीनंतर वरिष्ठांनी सांगितल्यास मुख्यमंत्रि‍पदाचा राजीनामा देईल, असे सिद्दारमैया यांनी स्पष्ट केलं. मुख्यमंत्री सिद्दारमैया यांच्या वक्तव्यामुळे राजकीय वर्तुळात चर्चांना उधाण आलं आहे.

सूत्रांनी दिलेल्या माहितीनुसार, काँग्रेस हायकमांड हे सिद्दारमैया यांची समजूत काढत आहेत. या बैठकीत कर्नाटकाचे मुख्यमंत्री सिद्दारमैया, उपमुख्यमंत्री डी के शिवकुमार देखील दिल्लीला पोहोचले आहेत. या बैठकीमुळे कर्नाटकात मुख्यमंत्री बदलण्याच्या हालचालींना वेग आला आहे. या बैठकीत काँग्रेस अध्यक्ष मल्लिकार्जुन खरगे, लोकसभेतील विरोधी पक्ष नेते राहुल गांधी, खासदार केसी वेणुगोपाल , इतर नेते उपस्थित आहेत.

सूत्रांच्या माहितीनुसार, कर्नाटकात मागील काही महिन्यांपासून नेतृत्व बदलण्याचा मुद्दा ऐरणीवर आला आहे. मागील काही महिन्यांत कर्नाटकातील काँग्रेसचे नेतृत्व बदलण्याची चर्चा सुरू आहे. त्यामुळे कर्नाटाकात डीके शिवकुमार यांना मुख्यमंत्रिपदाची जबाबदारी मिळण्याची शक्यता आहे. परंतु काँग्रेस पक्षाने हा दावा फेटाळून लावला आहे.

बैठक झाल्यानंतर काँग्रेस नेत्यांनी मुख्यमंत्री बदलण्यावरून कोणतीही चर्चा झाली नसल्याचे म्हटलं आहे. पक्षाने स्पष्ट म्हटलं की, सिद्दारमैया हेच पक्षाचे मुख्यमंत्री राहतील. त्यांना मुख्यमंत्रि‍पदावरून हटवण्याची कोणतीही योजना आखण्यात आलेली नाही. काँग्रेसने मुख्यमंत्री बदलण्याची चर्चा फेटाळून लावली आहे.

सूत्रांच्या माहितीनुसार, पक्षाने सिद्दारमैया मुख्यमंत्रि‍पदावरून पाय उतार होण्यास सांगितलं आहे. सिद्दारमैया यांना सांगण्यात आलं आहे की, कोणताही निर्णय घ्याल, तो विचारपूर्वक घ्याल. त्यानंतर के सी वेणुगोपाल यांना कळवा. त्यामुळे सिद्दारमैया हे पुढील काही दिवसांत राजीनामा देण्याची शक्यता व्यक्त केली जात आहे. तर सिद्दारमैया हे राज्यसभेवर जाण्यास इच्छुक नाहीत. राहुल गांधी यांना सिद्दारमैया राज्यसभेवर जाण्याचा सल्ला दिला होता.