Karnataka Assembly Election 2023: सध्या कर्नाटकमध्ये विधानसभा निवडणूकीची रणधुमाळी सुरू आहे. त्यामुळे जोरदार प्रचाराच्या फैरी झडत असल्याचे पाहायला मिळत आहे. ज्यामध्ये भाजप- कॉंग्रेसमध्ये जोरदार आरोप प्रत्यारोप सुरू आहेत. अलीकडेच काँग्रेसचे अध्यक्ष मल्लिकार्जुन खरगे यांनी पंतप्रधान नरेंद्र मोदींची तुलना विषारी सापाशी केली होती. यावरून आता पंतप्रधान नरेंद्र मोदींनीही जोरदार हल्लाबोल केला आहे. (Latest Marathi News)

याबाबत अधिक माहिती अशी की, तीन दिवसांपूर्वी काँग्रेसचे (Congress) अध्यक्ष मल्लिकार्जून खर्गे यांनी नरेंद्र मोदींचा उल्लेख 'विषारी साप' असा केला होता. त्यांच्या विधानाने देशभरात काँग्रेसविरोधात टीकेची झोड उठवली गेली. याच टिकेवरुन कर्नाटकमधील कोलार येथील प्रचारसभेतून पंतप्रधान मोदी (PM Narendra Modi) यांनी काँग्रेसवर हल्लाबोल केला आहे.

काय म्हणाले पंतप्रधान मोदी....

यावेळी बोलताना पंतप्रधान नरेंद्र मोदी यांनी "मी भ्रष्टाचाराला विरोध करतो, म्हणून काँग्रेसकडून माझ्यावर टीकेची झोड उठवली जाते.  मी भ्रष्टाचाराविरोधात लढा उभा केल्याने काँग्रेसला त्रास होत आहे. त्यामुळे काँग्रेसचा माझ्याबाबत तिरस्कार आणखी वाढत आहे. त्यांनी माझ्यावर टीकेची झोड उठवली आहे," असा घणाघात केला.

तसेच यावेळी पुढे बोलताना "काँग्रेसवाले माझी तुलना सापाशी करीत आहेत आणि मतं मागत आहेत. परंतु हा साप भगवान शंकराच्या गळ्यातला आहे. तो शोभनीय असून माझ्यासाठी देशातील जनता देवाचं शंकराचं स्वरुप आहे. त्यामुळे मला हा साप बनणं आवडेल," अशा शब्दात कॉंग्रेसच्या टीकेला चोख प्रत्युत्तर दिले आहे.