कर्नाटकच्या कलबुर्गी जिल्ह्यातील चित्तपूर तालुक्यात हृदयद्रावक घटना घडली आहे. भीषण अपघातात एकाच कुटुंबातील पाच जणांचा दुर्दैवी मृत्यू झाला आहे. लाडलापूरजवळ राष्ट्रीय महामार्गावर कार आणि ट्रक यांच्यात समोरासमोर झालेल्या धडकेत ही दुर्घटना घडली. या घटनेमुळे मृतांच्या कुटुंबियांवर दुःखाचा डोंगर कोसळला आहे. याप्रकरणी पोलीस पुढील तपास करत आहेत.

मिळालेल्या माहितीनुसार, चित्तपूर तालुक्यातील इंगलागी गावातील हे कुटुंब शुक्रवारी रात्री उशिरा कारमधून यादगीरहून आपल्या गावी परत येत होते. गावातील एका आजारी नातेवाईकाला उपचारासाठी यादगीर येथील रुग्णालयात दाखल करण्यात आले होते. त्याची विचारपूस करून कुटुंबातील पाच सदस्य परतत असताना हा दुर्दैवी अपघात झाला.

लाडलापूरजवळ राष्ट्रीय महामार्गावर पोहोचताच समोरून येणाऱ्या ट्रकशी कारची जोरदार धडक झाली. धडक इतकी भीषण होती की कारमधील प्रवासी तोलुसाब केशव (२७), हुसेन शाह (४८), मैबूब अली (४५), रसूल बी (४२) आणि फातिमा अली (३८) यांचा जागीच मृत्यू झाला. अपघाताच्या आवाजाने स्थानिक नागरिकांनी तात्काळ घटनास्थळी धाव घेतली आणि बचावकार्य सुरू केले.

घटनेची माहिती मिळताच पोलीस घटनास्थळी दाखल झाले. त्यांनी मृतदेह वाहनातून बाहेर काढून शवविच्छेदनासाठी वाडी शासकीय रुग्णालयात पाठवले. वरिष्ठ पोलीस अधिकाऱ्यांनीही घटनास्थळाची पाहणी केली असून अपघाताचे नेमके कारण शोधण्यासाठी तपास सुरू आहे. वाडी पोलीस ठाण्यात या प्रकरणी गुन्हा दाखल करण्यात आला आहे. एकाच कुटुंबातील पाच जणांचा एकाच वेळी मृत्यू झाल्याने मृतांच्या कुटुंबीयांवर दुःखाचा डोंगर कोसळला आहे.