इराणचे सर्वोच्च नेता अयातुल्ला अली खामेनेईच्या हत्येनंतर पाकिस्तानच्या कराचीमध्ये अमेरिकेचा निषेध व्यक्त करण्यासाठी रस्त्यावर निदर्शने करणे तेथील नागरिकांना चांगलेच महागात पडले आहे. अमेरिकेच्या जवानांनी थेट या आंदोलकांवर गोळीबार केला. पाकिस्तानमधील सिंध सरकारच्या प्रवक्त्याने हा खुलासा केला. या गोळीबारात किमान २२ पाकिस्तानी नागरिकांचा मृत्यू झाला. राज्य सरकारने चौकशी करण्याचे आश्वासन दिले आहे. मात्र पंतप्रधान शाहबाज शरीफ सरकारने मौन बाळगले आहे, असे म्हटले जात आहे की पाकिस्तान सरकार या विषयावर बोलून अमेरिकेसोबत संबंध खराब करू इच्छित नाही.

पत्रकारांशी बोलताना पाकिस्तानमधील सिंध सरकारचे प्रवक्ते सुखदेव हेमनानी म्हणाले, काही लोकांनी कराचीतील अमेरिकन वाणिज्य दूतावासाजवळ निदर्शने केली. यादरम्यान अमेरिकन मरीन गार्डच्या कर्मचाऱ्यांनी गोळीबार केला, ज्यामध्ये २२ लोकांचा मृत्यू झाला. किमान ३४ लोकांना रुग्णालयात दाखल करण्यात आले आहे. पाकिस्तानचे गृहमंत्री मोहसिन नक्वी यांच्या मते, पाकिस्तानी नागरिकांची चूक होती.

छातीत आणि चेहऱ्यावर झाडल्या गोळ्या

पाकिस्तानच्या ब्रीफ मासिकाने याबद्दल वृत्त दिले. त्यात म्हटले आहे की अमेरिकन मरीन गार्ड सैनिकांनी निदर्शकांवर छातीत आणि चेहऱ्यावर गोळ्या झाडल्या. २०११ नंतर पहिल्यांदाच अमेरिकन सैन्याने पाकिस्तानींवर गोळीबार केला आहे. अमेरिकन दूतावासाने या प्रकरणावर अधिकृत निवेदन जारी केलेले नाही. त्याऐवजी, त्यांनी व्हिसा सेवा निलंबित करण्याचे आदेश दिले आहेत.

पाकिस्तानच्या परराष्ट्र मंत्रालयाने जारी केलेल्या निवेदनातही अमेरिकन सैन्याबाबत कोणतीही टिप्पणी केलेली नाही. कराची हे एक बंदर शहर आहे आणि अमेरिकेने तेथे वाणिज्य दूतावासाच्या सुरक्षेसाठी मरीन गार्ड्स तैनात केले आहेत.

पाकिस्तानमध्ये ३ कोटी शिया समाज

पाकिस्तानमधील शिया समुदायाची लोकसंख्या 3.7 कोटी इतकी आहे, जी एकूण लोकसंख्येच्या अंदाजे १५ टक्के आहे. पाकिस्तानची एकूण लोकसंख्या २४ कोटी आहे. पाकिस्तानचे पंतप्रधान शाहबाज शरीफ यांनी खामेनी यांच्या हत्येबद्दल शोक व्यक्त केला, परंतु त्यांनी अमेरिकेवर कोणतीही प्रतिक्रिया दिलेली नाही. इराण हा पाकिस्तानचा शेजारचा देश आहे. या दोघांमध्ये फक्त 909 किलोमीटरची सीमा आहे. पाकिस्तानच्या बलुचिस्तान प्रांताचा बहुतांश भाग इराणला लागून आहे.