रोहित कदम, साम टीव्ही

पाकिस्तानात आयोजित केलेल्या इराण-अमेरिका यांच्यातील बोलणी फिस्कटली आणि अमेरिकेनं होर्मुझच्या बाहेर नाकेबंदीची घोषणा केली. त्यानंतर अमेरिकेनं ओमानच्या आखातात तब्बल 10 हजार सैन्य तैनात केलंय. मात्र, नाकेबंदी असतानाही होर्मुझमधून पहिल्याच दिवशी चीनसह अनेक देशांची 20 जहाजं सुरक्षितरित्या बाहेर पडली. मात्र मध्यस्थी करणाऱ्या पाकिस्तानचीच जहाजं अमेरिकेनं होर्मुझमधून परत पाठवली. कशी झाली पाकिस्तानची नाचक्की ते पाहूयात...

इराणने पाकिस्तानला होर्मुझच्या सामुद्रधुनीतून 20 जहाजांच्या वाहतुकीला परवानगी दिली. पाकिस्तानने चार जहाजं होर्मुझमधून बाहेर नेण्याचा निर्णय घेतला. मात्र अमेरिकेनं पाकिस्तानला मोठा दणका दिला. अल अरबियाच्या वृत्तानुसार, पाकिस्तानच्या दोन जहाजांनी होर्मुझच्या सामुद्रधुनीतून बाहेर पडण्याचा प्रयत्न केला. मात्र, अमेरिकी सैन्याने त्यांना परत पाठवलं. एकीकडे चीन आणि इतर देशांच्या जहाजांनी त्याच मार्गावरून प्रवास केला. मात्र मध्यस्थी करणाऱ्या पाकिस्तानचंच जहाज अमेरिकेनं अडवलं.

होर्मुझमध्ये अमेरिकेनं केलेल्या नाकेबंदीचा फटका सगळ्या जगाला बसलाय. यातून सूट मिळेल असा पाकिस्तानचा गोड गैरसमज होता..मात्र तो अमेरिकेनं एका झटक्यात दूर केलाय. पाकिस्ताननंही याची कबुली दिलीय.

आता होर्मुझमध्ये अमेरिकेनं दणका दिल्यानंतर पाकिस्तानचा 'मध्यस्थीचा फुगा' फुटलाय. इतकंच नाहीतर अवघ्या दोन दिवसांवर येऊन ठेपलेल्या शांतता चर्चेआधीच अमेरिकेनं पाकिस्तानला तोंडघशी पाडलंय. तर दुसरीकडे, युद्धाच्या पार्श्वभूमीवर देशातील वाढती महागाई आणि कर्ज परतफेड या दुहेरी संकटामुळे पाकिस्तानची अवस्था इकडे आड, तिकडे विहीर अशी झालीये. त्यामुळे इराण-अमेरिका युद्धात शांतीदूत बनण्यासाठी निघालेलं पाकिस्तानची अवस्था न घर का ना घाट का ...अशी झालीय.