मस्साजोगचे दिवंगत सरपंच संतोष देशमुख यांच्या हत्याकांडाची आग अजूनही राज्यात धगधगत आहे. या घटनेला ३ महिने उलटले, मात्र अद्याप या प्रकरणाचा छडा लागलेला नाही. या घटनेचा निषेध तसेच मारेकऱ्यांना शिक्षा झालीच पाहिजे, अशी मागणी राज्यातील कानाकोपर्‍यातून होत आहे.

फक्त बीड किंवा राज्य नाही तर, देशमुखांच्या हत्येचा निषेध सातासमुद्रापारमधून केला जात आहे. थेट इंग्लंडमध्ये एका भारतीय महिलेनं देशमुख प्रकरणातील आरोपींचे फोटो जाळत होळी केली आहे. याचे फोटो सध्या सोशल मीडियात व्हायरल होत आहे.

महिलेने यासंदर्भात सोशल मीडियात व्हिडिओ पोस्ट केला आहे. त्या व्हिडिओमध्ये तिनं म्हटलं की, 'मी संतोष देशमुख यांची हत्या करणाऱ्या नराधमांचा निषेध व्यक्त करत त्यांची होळी करत आहे. नराधमांनी संतोष देशमुख यांची निर्घृणपणे हत्या केली. या हत्याकांडाचे फोटो समोर आले आहेत. माणुसकीला काळिमा फासणारी ही घटना आहे. आम्ही या घटनेचा निषेध करतो', अशा शब्दात भारतीय महिलेनं या घटनेचा निषेध व्यक्त केला.

तसेच सरकारकडे नराधमांना कठोरकठोर शिक्षा झाली पाहिजे अशी मागणी केली आहे. महिलेसोबत तिच्यासोबत असणाऱ्या चिमुकलीनं देखील निषेध व्यक्त केला आहे. सध्या या महिलेचा व्हिडिओ सोशल मीडियात व्हायरल होत आहेत.

दरम्यान, संतोष देशमुख हत्या प्रकरणातील सीआयडीनं सादर केलेल्या दोषारोपत्रातून अनेक बाबी समोर येत आहेत. मारहाणीचे फोटो आणि हत्याराचे फोटो पाहून अनेकांची तळपायाची आग मस्तकात गेली. या गुन्ह्यातील आरोपी कृष्णा आंधळे अद्याप फरार असून त्याचा शोध पोलीस घेत आहेत.