कर्नाटकातील एका रेल्वे स्थानकावर घडलेली एक घटना सध्या सोशल मीडियावर जोरदार गाजत आहे. तिकीट खिडकीवर तैनात असलेल्या एका कर्मचाऱ्याचा व्हिडिओ व्हायरल झाला असून, तो ड्युटीच्या वेळेत प्रवाशांच्या लांबच लांब रांगेकडे दुर्लक्ष करून निवांतपणे फोनवर बोलत असल्याच स्पष्टपणे दिसून येत आहे. या घटनेमुळे प्रवाशांमध्ये संतापाची लाट उसळली असून, रेल्वे प्रशासनाने संबंधित कर्मचाऱ्यावर तत्काळ कारवाई केली आहे.

सदर व्हिडिओमध्ये दिसते की, तिकीट खिडकीवर बसलेला सी महेश नावाचा कर्मचारी फोनवर अगदी निवांतपणे संभाषण करत होता, तर दुसरीकडे तिकीट मिळवण्यासाठी प्रवासी दीर्घकाळ रांगेत उभे होते. काही प्रवाशांनी वेळोवेळी विनंती करूनही त्याने त्यांचे म्हणणे दुर्लक्षित केले. एका प्रवाशाने थेट त्याच्याशी संवाद साधत ‘फक्त एक मिनिट थांबा’ हे उत्तर सतत देत असल्याचा उल्लेख केला. मात्र, हा 'एक मिनिट' तब्बल १५ मिनिटांपर्यंत लांबले.

प्रवाशांच्या या नाराजीला उत्तर देताना, संबंधित कर्मचारी कोणताही खेद व्यक्त करत नसल्याचेही दिसून आले. उलट, त्याने शांतपणे लोकांना थांबण्यास सांगितले आणि संभाषण चालू ठेवले. अखेर, वातावरणात वाढती अस्वस्थता लक्षात घेत त्याने कॉल डिस्कनेक्ट केला आणि तिकीट वाटप सुरू केलं.

या व्हिडिओने सोशल मीडियावर खळबळ माजवली असून, नागरिकांनी रेल्वे कर्मचाऱ्यांच्या अशा वागणुकीवर संताप व्यक्त केला आहे. काहींनी हे वर्तन "लज्जास्पद" असे म्हटले तर काहींनी यासारख्या घटनांवर लगाम घालण्यासाठी नियमित तपासणी आणि अधिक कडक शिस्तीची मागणी केली. काही वापरकर्त्यांनी रेल्वे कर्मचार्‍यांवरील कामाचा ताण मान्य केला असला, तरीही अशा प्राथमिक जबाबदाऱ्यांकडे दुर्लक्ष करणे योग्य नसल्याचे मत अनेकांनी व्यक्त केले.

या सर्व प्रकाराची गंभीर दखल घेत रेल्वे प्रशासनाने त्वरित पावले उचलली आहेत. गुंटकल रेल्वे विभागाने सांगितले की, सी महेश या कर्मचाऱ्याला निलंबित करण्यात आले आहे. एक जागरूक प्रवासी स्टेशन मॅनेजरला व्हिडिओ पाठवल्यानंतरच संबंधित विभागाने ही कारवाई केली. स्टेशन मॅनेजर भागीरथ मीना यांनीही या निलंबनाची अधिकृत पुष्टी केली असून, कर्मचाऱ्याच्या निष्काळजीपणामुळे ही कारवाई करण्यात आल्याचे त्यांनी स्पष्ट केले आहे.

ही घटना उदाहरण ठरली आहे की, सामान्य नागरिकांच्या सहनशीलतेला न जुमानता शासकीय जबाबदाऱ्यांची उघडपणे पायमल्ली झाल्यास त्याचा परिणाम काय होऊ शकतो. प्रवाशांनी दाखवलेल्या जागरुकतेमुळे एक गैरजबाबदार कर्मचारी आता निलंबित करण्यात आला आहे.