India Cheapest Train Ticket : भारतीय रेल्वेमध्ये कोच आणि सुविधांच्या आधारे तिकीटाची किंमत ठरवली जाते. जनरल आणि स्लीपर कोचच्या तुलनेमध्ये रेल्वेच्या एसी कोचचे तिकीट जास्त असते. एसी ट्रेनमधील कोचची किंमत ही स्लीपर तिकीटच्या दुप्पट असते. तिकीटदरामुळे एसी कोचने प्रवास करणे बरेचसे लोक टाळतात. दरम्यान भारतीय रेल्वेमध्ये एक अशी ट्रेन आहे, ज्यात प्रवास फक्त प्रति किलोमीटरला फक्त ६८ पैसे खर्च येतो. या एसी ट्रेनचे नाव काय? जाणून घ्या..

वंदे भारत, नमो भारत, राजधानी या गाड्यांप्रमाणे या ट्रेनमध्ये ही एसीसह अन्य सुविधा आहेत. पण बाकी एक्स्प्रेस गाड्यांच्या तुलनेमध्ये या ट्रेनचे तिकीटदर कमी आहे. या ट्रेनमध्ये प्रवास करण्याचा खर्च प्रतिकिलोमीटर ६८ पैसे इतका आहे. प्रवाशांना कमी तिकीटदरात एयर कंडिशन ट्रेनमध्ये प्रवास करता यावा यासाठी ही ट्रेन सुरु करण्यात आली होती.

सर्वात कमी तिकीटदर असणाऱ्या ट्रेनचे नाव 'गरीब रथ एक्स्प्रेस' असे आहे. काहीजण या ट्रेनला गरीबांची राजधानी एक्स्प्रेस असेही म्हणतात. या एक्स्प्रेस ट्रेनचा पहिला प्रवास २००६ मध्ये सुरु झाला होता. बिहारच्या सहरसा ते अमृतसरपर्यंत ट्रेनचा प्रवास झाला होता. आज ही गाडी विविध शहरांच्या २६ मार्गांवर धावते. दिल्ली-मुंबई, दिल्ली-चेन्नई, पटना-कोलकाता अशा महत्त्वपूर्ण मार्गिकांवर या एक्स्प्रेस ट्रेनचा प्रवास सुरु असतो.

चेन्नई ते हजरत निजामुद्दीन धावणाऱ्या गरीब रथ एक्स्प्रेसचे तिकीट १,५०० रुपये आहे. २०७५ लांब मार्गिकेवरील हा प्रवास करण्यासाठी २८-२९ तास लागतात. ही गरीब रथ एक्स्प्रेस ट्रेनची सर्वात लांब मार्गिका आहे. याच मार्गावर राजधानी एक्स्प्रेस सुद्धा धावते. राजधानी एक्स्प्रेसच्या थर्ड क्लास एसी कोचचे तिकीट ४,२१० इतके आहे. यावरुनच दोन्ही ट्रेनच्या तिकीटांच्या किंमतीमध्ये किती फरक आहे हे लक्षात येते. याच कारणामुळे गरीब रथ ट्रेनचे तिकीट सहज मिळत नाही.