Shocking : एमटेकमध्ये शिक्षणारा एक विद्यार्थी त्याच्या परीक्षासाठी अभ्यास करत होता. परीक्षेच्या आदल्या रात्री तो त्याच्या दोन मित्रांसह एका खोलीत पेपरची तयारी करत होता. तिघांनी पहाटे ३ वाजेपर्यंत अभ्यास केला. त्यानंतर ते तिघेही झोपी गेले. सकाळी सहाच्या सुमारास या तरुणाच्या मित्रांनी त्याला उठवण्याचा प्रयत्न केला पण तो उठलाच नाही. रुग्णालयात नेल्यानंतर त्याला मृत घोषित करण्यात आले.

मिळालेल्या माहितीनुसार, वाराणसीतील आयआयटी-बीएचयूमधील एमटेकचा विद्यार्थी अनूप सिंह चौहानचा बुधवारी (३ ऑगस्ट) परीक्षा होती. त्यासाठी तो मंगळवारी (२ ऑगस्ट) रात्रभर मित्रासोबत अभ्यास करत होता. तयारी केल्यानंतर तो झोपी गेला. सकाळी मित्रांनी अनूपला उठवण्याचा प्रयत्न केला पण तो जागा झालाच नाही.

अनूपचे शरीर थोडे गरम होते. मित्रांनी त्याला सीपीआर देण्याचा प्रयत्न केला. पण या गोष्टीचा काहीच परिणाम झाला नाही. अनूप उठत नसल्याचे समजल्यावर मित्रांनी ताबडतोब आयआयटी प्रशासनाला याची माहिती दिली. त्याला बीएचयूच्या सर सुंदर लाल रुग्णालयात नेण्यात आले. तेथे डॉक्टरांनी अनूपला मृत घोषित केले. अनूपच्या मृत्यूचे कारण हृदयविकाराचा झटका असावा असा अंदाज डॉक्टरांनी वर्तवला आहे.

पोस्टमॉर्टम रिपोर्ट आल्यानंतरच अनूपच्या मृत्यूचे कारण समोर येईल असे पोलिसांनी म्हटले आहे. पोस्टमोर्टम केल्यानंतर पोलिसांनी अनूपचा मृतदेह त्याच्या कुटुंबीयांकडे सोपवला आहे. अनूप सिंह चौहान हा मूळचा आझमगडचा आहे, त्याचे वडील व्यवसायाने वकील आहे. अनूप घरातील थोरला मुलगा आहे. त्याच्या मृत्यूमुळे कुटुंबावर शोककळा पसरली आहे.