बांग्लादेशात हिंदूंवर दिवसेंदिवस हल्ले वाढताना दिसतायेत. दीपूचंद्र दास या तरूणाला जिवंत जाळण्याची घटना ताजी असतानाच जमावाने आणखी एका हिंदू तरूणाला लक्ष्य करण्याचा प्रयत्न केल्याचा प्रकार समोर आलाय. खोकन चंद्र असं या तरूणाचं नाव आहे. हा तरुण थर्टी फर्स्टच्या रात्री केउरभांगा बाजार येथील आपलं औषधांचे दुकान बंद करून घरी परतत होता. रात्री 9 च्या सुमारास तिलोई परिसरात दबा धरून बसलेल्या गुंडांनी त्याला रस्त्यात अडवलं. जमावानं आधी त्याला बेदम मारहाण केली. धारदार शस्त्रांनी त्यांच्यावर वार केला.

एवढ्यावरच न थांबता नराधमांनी त्याच्या अंगावर पेट्रोल ओतून त्यांना पेटवून दिलं. गंभीर जखमी अवस्थेत असलेल्या खोकन यांनं प्रसंगावधान राखत जवळच्या तलावात उडी घेतली. स्थानिक नागरिकांनी त्यांना तातडीने शरीयतपूर सदर रुग्णालयात दाखल केलं. खोकन याची प्रकृती सध्या चिंताजनक असल्याचे डॉक्टरांनी सांगितलंय. भारतविरोधी तरुण नेता शरीफ ओसमान हादी याच्या हत्येनंतर बांगलादेशात हिंदू समुदायावर हल्ले आणि मॉब लिंचिंगच्या घटनांमध्ये वाढ झालीय.

हादीच्या मारेकऱ्यांनी भारतात आश्रय घेतल्याच्या अफवेमुळे या आंदोलनाला भारतविरोधी वळण लागलय. या पार्श्वभूमीवर खोकन यांच्यावर झालेल्या हल्ल्यामुळे हिंदू समुदायामध्ये भीतीचं आणि चिंतेचं वातावरण आहे.