हिमाचल प्रदेशातील कांग्रा जिल्ह्यातील नूरपूर परिसरात एक भीषण रस्ते अपघात झाला. चंबाहून उनाकडे जाणारी एक खासगी बस भरधाव वेगाने जात होती. बस नियाजपूरजवळ आली असताना बस अचानक अनिंयत्रित झाली आणि उलटली. या बसमध्ये सुमारे ४० प्रवासी होते, त्यापैकी अंदाजे २२ जण जखमी झाले.

प्रत्यक्षदर्शींच्या मते, बस चालकाला अचानक हृदयविकाराचा झटका आला. त्यामुळे बस अनिंयत्रित झाली आणि उलटली, असं सांगितलं जात आहे. चालकाची प्रकृती अचानक खालावल्यामुळे त्याचे बसवरील नियंत्रण सुटले आणि ती रस्त्याच्या कडेला उलटली. हा अपघात इतका अचानक घडला की प्रवाशांना काही घडलं ते समजलेच नाही.

जखमींवर उपचार सुरू

अपघातानंतर स्थानिक आणि अधिकारी तात्काळ घटनास्थळी पोहोचले. त्यानंतर त्यांनी बचावकार्य सुरू केले. सर्व जखमींना तात्काळ नूरपूर सिव्हिल हॉस्पिटलमध्ये दाखल करण्यात आले आहे. त्यांच्यावर सध्या उपचार सुरू आहेत. डॉक्टरांच्या म्हणण्यानुसार, बहुतेक जखमींची प्रकृती स्थिर आहे, परंतु तिघांची प्रकृती गंभीर आहे. टांडा मेडिकल कॉलेजमध्ये दाखल करण्यात आले आहे, जिथे त्यांच्यावर उपचार सुरू आहेत.

घटनेची माहिती मिळताच पोलीस आणि प्रशासकीय पथके घटनास्थळी दाखल झाली. नूरपूरचे पोलीस अधीक्षक यांनी सांगितले की, अपघाताच्या कारणाचा तपास सुरू आहे. संपूर्ण परिस्थितीवर लक्ष ठेवले जात आहे. जखमींना सर्वतोपरी वैद्यकीय मदत देण्याचे निर्देश देण्यात आले आहेत. बस उलटल्याने प्रवाशांमध्ये घबराट पसरली. अनेक जण आत अडकले होते, त्यांना स्थानिकांच्या मदतीने बाहेर काढण्यात आले. अपघातानंतर काही काळ रस्त्यावरील वाहतूकही विस्कळीत झाली होती.