हिमाचल प्रदेशमध्ये पावसाने धूमाकूळ घातला आहे. हिमाचलच्या कुल्लूमध्ये मुसळधार पावसामुळे पूर आला आहे. धर्माशालाजवळील मणुणी खड्डमध्ये अचानक आलेल्या पुरामुळे मोठी दुर्घटना घडली आहे. या पुरात १५ ते २० मजूर वाहून गेल्याची भीती व्यक्त केली जात आहे. आतापर्यंत दोन मजुरांचा मृतदेह सापडले आहेत. या मृतदेहांची ओळख पटलेली नाही.

धर्मशाळाचे आमदार सुधीर शर्मा यांनी दुर्घटनेच्या वृत्ताला दुजोरा दिला आहे. अनेक मजूर किनाऱ्याजवळील शेडमध्ये राहत होते. मात्र, अचानक आलेल्या पुरामुळे अनेक मजूर वाहून गेले'. या दुर्घटनेत मृत पावलेल्या लोकांना वर्मा यांनी श्रद्धांजली वाहिली.

घटनेची माहिती मिळताच जिल्हा प्रशासनाने बचाव कार्याला सुरुवात केली. एसडीआरएफ आणि स्थानिक पोलिसांचं पथक घटनास्थळी पोहोचलं आहे. एकाचा मृतदेह लुंटा परिसरात आढळला आहे. तर दुसरा मृतदेह हा नगुणीजवळील खड्ड भागात आढळला. पुरात वाहून गेलेले मजूर हायड्रो प्रकल्पासाठी काम करत होते. मुसळधार पावसामुळे अनेक मजूर कामावर पोहोचले नव्हते. यातील बहुतांश मजूर हे दुसऱ्या राज्यातील आहेत. स्थानिक मजुरांची संख्या फार कमी आहे.

दोघांचे मृतदेह आढळले

धर्मशाळेतील प्रशासकीय अधिकारी मोहित रत्न यांनी सांगितलं की, 'पुरात वाहून गेलेले मजूर आणि नुकसान याची माहिती गोळा करण्याचं काम सुरु आहे'. कांगडाच्या एसएसपी शालिनी अग्निहोत्री यांनी म्हटलं की, आतापर्यंत दोघांचे मृतदेह ताब्यात घेण्यात आले आहेत. बचाव कार्य सुरु आहे.