हरियाणाच्या फरीदाबादमधील बल्लभगड येथून एक धक्कादायक घटना समोर आली आहे. एका तरूणाचा गुगलवर कॉल गर्लचा नंबर शोधणं चांगलंच महागात पडलं आहे. सायबर फसवणूक करणाऱ्यांनी त्याला सापळ्यात अडकवलं. तसेच २,३०,८०० रूपयांची फसवणूक केली. या प्रकरणी सेक्टर २ येथील रहिवासी तरूणाने पोलिसात तक्रार दाखल केली. तक्रारीच्या आधारे पोलिसांनी गुन्हा दाखल केला असून, पुढील तपास सुरू आहे.

पीडित तरूणानं दिलेल्या माहितीनुसार, १९ नोव्हेंबर रोजी तरूण कॉल गर्लचा मोबाईल नंबर शोधत होता. सर्चिंगमध्ये त्याला एक नंबर सापडला. त्या नंबरवर चॅट केल्यानंतर त्याला दुसरा मोबाईल नंबर देण्यात आला. २२ नोव्हेंबरला त्यानं दिलेल्या नंबरवर कॉल केला. तेव्हा आरोपीनं त्याला जुना फरीदाबाद चौकातील एका हॉटेलमध्ये बोलावले.

आरोपीनं तरूणाला आणखी एक व्हॉट्सअॅप नंबर दिला. हॉटेलमध्ये पोहोचल्यानंतर त्या तरूणानं दिलेल्या नंबरवर व्हॉट्सअॅप कॉल केला. आरोपीनं पीडित तरूणाकडून पैसे मागितले. आरोपीनं सर्व्हिस चार्ज, हॉटेल एंट्री फी, पोलीस व्हेरिफिकेशन, जीएसटी आणि इतर शुल्काच्या बहाण्याने तीन वेगवेगळ्या खात्यांमध्ये पैसे मागितले.

पीडित तरूणानं मित्रांच्या मार्फत आरोपीच्या बँक खात्यात पैसे जमा केले. या प्रकरणात तरूण फसला. त्याच्याकडून आरोपीनं २ लाख ३० हजार ८०० रूपये उकळले. या घटनेनंतर पीडित तरूणानं पोलीस ठाण्यात धाव घेतली. तसेच आरोपीविरोधात तक्रार दाखल केली. सध्या पोलिसांकडून आरोपीचा शोध सुरू आहे.