Vinesh Phogat Won: कुस्तीच्या मैदानातून राजकारणाच्या आखाड्यात उतरलेल्या महिला कुस्तीपटू विनेश फोगाटने विधानसभा निवडणुकीत बाजी मारली आहे. काँग्रेसच्या तिकिटावर विधानसभा निवडणूक लढवलेल्या विनेश फोगाटने ५७६१ मतांनी दणदणीत विजय मिळवला. तिने भारतीय जनता पक्षाचे उमेदवार योगेश बैरागीला चितपट केले.

हरियाणा विधानसभा निवडणुकांचे निकाल आज जाहीर होत आहेत या विधानसभा निवडणुकीत जुलाना विधानसभेची जागा सुरुवातीपासूनच राज्यातील सर्वात चर्चेत जागांपैकी एक होती. या जागेवर काँग्रेसने कुस्तीपटू विनेश फोगट यांना तिकीट देऊन भाजपला शह देण्यासाठी मोठी खेळी केली होती. त्याचवेळी दलित चेहरा असलेल्या कॅप्टन योगेश बैरागी यांना भाजपने तिकीट दिले होते. या रोमहर्षक लढतीत अखेर आता विनिश फोगाटने बाजी मारली आहे.

जुलाना विधानसभा मतदारसंघातून कुस्तीपटू विनेश फोगट विजयी झाल्या आहेत.मतमोजणीच्या १५ फेऱ्यांनंतर त्यांनी भाजपच्या योगेश कुमार यांचा ५ हजारांहून अधिक मतांनी पराभव केला. ही जागा जिंद जिल्ह्यातील 5 विधानसभा जागांपैकी एक आहे. 1967 च्या हद्दवाढीनंतर अस्तित्वात आलेली ही जागा गेल्या निवडणुकीत काँग्रेस आणि भाजप या दोघांसाठी अवघड होती.

२०१९ च्या निवडणुकीत जननायक जनता पक्षाने (जेजेपी) ही जागा जिंकली होती. जेजेपीच्या अमरजीत धांडा यांनी दुसऱ्या क्रमांकावर असलेल्या भाजपच्या परमिंदर सिंग धुल यांचा पराभव केला. दोघांमध्ये सुमारे 24 हजार मतांचा फरक होता, तर काँग्रेसचे धर्मेंद्र सिंह धुल यांना 12,440 मते मिळाली. त्याचवेळी भाजपला या जागेवर पहिल्या विजयाची प्रतीक्षा आहे.