हरियाणा विधानसभा निवडणुकीत एक्झिट पोल्स आणि राजकीय पंडितांचे अंदाज चुकवत भाजप पुन्हा एकदा सत्तेत आलंय. हरियाणात आजपर्यंत विधानसभेच्या दोन टर्मनंतर कोणत्याही पक्षाचे सरकार तिसऱ्यांदा निवडून आलेलं नाही. मात्र भाजपनं ही किमया साधत हॅटट्रिक साजरी केलीये.

कोणाला किती मिळालेल्या जागा?

हरियाणा विधानसभा निवडणुकीत भाजपला सर्वाधिक 48 जागा मिळालेल्या आहेत. तर मुख्य विरोधीपक्ष असलेल्या काँग्रेसला 37 जागांवर समाधान मानावं लागलं आहे. तसेच आयएनडीला 3 आणि आयएनएलडीला 2 जागा मिळालेल्या आहेत.

कुस्तीपटू आणि शेतकऱ्यांच्या आंदोलनामुळे विधानसभा निवडणुकीपूर्वी देशव्यापी नाचक्की झाल्यामुळे हरियाणातील परिस्थिती भाजपसाठी प्रतिकूल मानली जात होती. मात्र, ही सगळी आव्हानं झुगारत भाजपनं सत्ता राखत हॅट्ट्रिक साधलीये. हिंदी पट्ट्यातील हरियाणात तिसऱ्यांदा सरकार स्थापन केल्यानं भाजप कार्यकर्त्यांच्या मनातील निराशेचे मळभ दूर झालंय. भाजपच्या विजयाची कारणं काय आहेत, हे जाणून घेऊ...

भाजपच्या विजयाची कारणं

मिळालेल्या माहितीनुसार, शेतकरी, कुस्तीपटूंच्या आंदोलनाचं प्रतिकूल वातावरण परतून लावण्यात यश आलं आहे. भाजपने विधानसभा निवडणुकीपूर्वी मुख्यमंत्री बदलला होता. मनोहरलाल खट्टरांऐवजी नायब सिंह सैनी यांना मुख्यमंत्रिपदी विराजमान केलं. जाट मतदार वगळून ओबीसींची मोट बांधण्याची रणनीती यशस्वी ठरली. काँग्रेसमधील हुड्डा आणि कुमारी शैलजांमधील अंतर्गत गटबाजीचा फायदाही या निवडणुकीत भाजपला मिळाला.

दुसरीकडे अनुकूल परिस्थिती असताना काँग्रेसला आलेले अपयश चर्चेचा विषय ठरणार आहे. हरियाणातील अपयशामुळे पुन्हा एकदा राहुल गांधी यांच्या नेतृत्त्वावर प्रश्न उपस्थित होणार आहे. हरियाणातील काँग्रेसचा पक्षातंर्गत संघर्ष पराभवासाठी कारण ठरला का याचं चिंतन काँग्रेसला करावं लागेल.