Gujarat Flood News: गुजरातमधील नवसारी आणि जुनागडसह अनेक जिल्ह्यांमध्ये पुरामुळे जनजीवन विस्कळीत झाले आहे. अहमदाबाद आणि सौराष्ट्र प्रदेशासह राज्याच्या दक्षिण भागात मुसळधार पाऊस सुरु आहे. धरणे आणि नद्यांमधील पाण्याची पातळी धोक्याच्या चिन्हावर वाढली आहे. त्यामुळे शहरी भागात आणि काही गावांमध्ये पूरसदृश परिस्थिती निर्माण झाली.

जुनागडमध्ये पाण्याच्या जोरदार प्रवाहात अनेक गाड्या आणि गुरे वाहून गेली. त्याचवेळी अहमदाबाद विमानतळावरही पाणी शिरले. दरम्यान, केंद्रीय गृहमंत्री अमित शाह यांनी रविवारी गुजरातचे मुख्यमंत्री भूपेंद्र पटेल यांच्याशी संवाद साधून राज्यातील विविध भागांतील पूरसदृश परिस्थितीची माहिती घेतली आहे.

मिळालेल्या माहितीनुसार, शनिवारी गुजरातच्या दक्षिणेकडील आणि सौराष्ट्र प्रदेशातील अनेक जिल्ह्यांमध्ये जोरदार पाऊस पडला. ज्यामुळे शहरी भागात पूरसदृश परिस्थिती निर्माण झाली आणि धरणे आणि नद्यांमधील पाण्याची पातळी धोकादायक पातळीपर्यंत वाढल्याने शहरांपासून अनेक गावांचे संपर्क तुटले.  (Latest Marathi News)

शनिवारी दुपारी चार वाजेपर्यंत गेल्या आठ तासांत शहरात 219 मिमी पाऊस झाला आहे. सुरक्षित ठिकाणी पोहोचण्यासाठी लोक कंबरभर पाण्यातून चालताना दिसत होते. त्यातील काहींना पाण्याच्या जोरदार प्रवाहापासून वाचवण्यात स्वयंसेवकांनी मदत केली. नवसारी आणि जुनागड जिल्ह्यांना पावसाचा सर्वाधिक फटका बसला आहे. पावसामुळे अनेक वस्ती व बाजारपेठांमध्ये पाणी साचले होते. (Gujarat Flood Video)

प्रशासनाने लोकांना खबरदारी घेण्याचे आवाहन केले असून कोणतीही अनुचित घटना किंवा आपत्कालीन परिस्थिती उद्भवल्यास नियंत्रण कक्षाशी संपर्क साधण्याचे आवाहन केले आहे. तसेच सखल भागातील लोकांना सुरक्षित स्थळी हलवण्यासाठी बचाव पथके तैनात करण्यात आली आहेत.

एनडीआरएफच्या पथकाने जुनागडमध्ये सुरू केलं बचावकार्य

गुजरातच्या अनेक भागांमध्ये संततधार पाऊस पडत असताना, नॅशनल डिफेन्स रिस्पॉन्स फोर्सच्या (NDRF) टीमने शनिवारी या प्रदेशातील जुनागड जिल्ह्यात बचावकार्य केले. बचावकार्यात एनडीआरएफचे जवान सामान्य लोकांपर्यंत पोहोचले आणि त्यांना शहरातील पूर आणि जलमय भागापासून सुरक्षित ठिकाणी जाण्यास मदत केली.