गुजरात : भारतीय जनता पार्टीच्या (BJP) आमदार आशा पटेल (Asha Patel) यांचा वयच्या (44व्या) वर्षी डेंग्यूवर उपचार सुरू असताना रविवारी निधन झाले आहे. माहितीनुसार, त्यांच्यावर अहमदाबाद येथील रुग्णालयात उपचार सुरू होते. याबद्दल पक्षाच्या नेत्यांनी अधिक माहिती दिली की, मेहसाणा जिल्ह्यातील उंझा विधानसभा मतदारसंघातील भाजपचे आमदार आशा पटेल यांना जयदल रुग्णालयात दाखल करण्यात आले होते. ता. 10 डिसेंबर रोजी त्यांना दाखल करून व्हेंटिलेटरवर ठेवण्यात आले होते.

हे देखील पहा-

त्याचवेळी गुजरातचे मुख्यमंत्री भूपेंद्र पटेल आणि राज्यपाल आचार्य देवव्रत यांनी त्यांच्या निधनाबद्दल शोक व्यक्त केला आहे. माजी उपमुख्यमंत्री नितीन पटेल यांनी पत्रकारांना सांगितले की, "अत्यंत दु:खाने कळवत आहे की, उंझा विभागाच्या आमदार आशा पटेल या आता आमच्यात नाहीत. डेंग्यूच्या उपचारासाठी त्यांना अहमदाबादच्या झायडस हॉस्पिटलमध्ये दाखल करण्यात आले होते, परंतु डॉक्टरांच्या टीमने सर्व प्रयत्न करूनही त्यांना वाचवता आले नाही.

नितीन पटेल यांनी असेही सांगितले की त्यांचे पार्थिव उंझा येथे नेले जाईल, जिथे सामान्य लोक त्यांना अंतिम श्रद्धांजली देऊ शकतील आणि सोमवारी सिद्धपूर स्मशानभूमीत त्यांचे अंतिम संस्कार केले जातील. भाजपच्या गुजरात युनिटने एका निवेदनात म्हटले आहे की दिल्लीहून परतल्यानंतर पटेल यांना डेंग्यू झाला होता आणि रविवारी या आजाराविरुद्धची लढाई हरली.