राजकीय पक्षांना वेळोवेळी मिळालेल्या देणग्यांवरून अनेक प्रश्न उपस्थित केले जातात. देणग्या घेणारे राजकीय पक्ष संशयाच्या फेऱ्यात अडकतात, तर कधी याच राजकीय पक्षांना देणग्या देणाऱ्यांवर शंका घेतली जाते. काँग्रेससह विरोधी पक्षांनी मतदार यादी घोळ आणि मतचोरीच्या आरोप करून निवडणूक आयोग आणि निवडणूक प्रक्रियेवरच प्रश्नचिन्ह उपस्थित केले असताना दैनिक भास्करच्या वृत्तानं पुन्हा खळबळ उडवून दिली आहे. गुजरातमध्ये १० अज्ञात राजकीय पक्षांना पाच वर्षांत ४३०० कोटी रुपयांच्या देणग्या मिळाल्याचं वृत्त प्रकाशित करण्यात आलं आहे. यावरून राहुल गांधींनी निवडणूक आयोगाला लक्ष्य केलं आहे.

दैनिक भास्करने प्रकाशित केलेल्या वृत्ताचं कात्रण राहुल गांधी यांनी सोशल मीडिया प्लॅटफॉर्म एक्सवर पोस्ट केलं आहे. त्यात त्यांनी अनेक प्रश्न उपस्थित केले आहेत. गुजरातमध्ये काही अज्ञात पक्ष आहेत, ज्यांची नावं कधीच ऐकली नाहीत. पण त्यांना ४३०० कोटी रुपयांच्या देणग्या मिळालेल्या आहेत. या राजकीय पक्षांनी खूप कमी वेळा निवडणुका लढवल्या आहेत. तसेच पैसे खर्च केले आहेत.

राहुल गांधींनी यासंबंधित अनेक प्रश्न विचारले आहेत. हे हजारो कोटी रुपये आले कुठून? हे राजकीय पक्ष कुणाचे, ते चालवतं कोण? निवडणूक आयोग चौकशी करणार का किंवा यावेळीही शपथपत्राची मागणी करणार? डेटा लपवण्यासाठी पुन्हा कायद्यात बदल करणार का? अशा अनेक प्रश्नांची सरबत्ती राहुल गांधी यांनी केली आहे.

राहुल गांधी गेल्या दोन महिन्यांपासून निवडणूक आयोगाला लक्ष्य करत आहेत. आयोगाच्या कारभाराविरोधात त्यांनी दंड थोपटले आहेत. या देशात निवडणूक आयोग भाजपसाठी काम करत आहे, असा आरोपही त्यांनी केला आहे. गुजरातमधील राजकीय पक्षांना मिळालेल्या देणग्यांवरूनही त्यांनी निवडणूक आयोगाकडे बोट दाखवलं आहे. निवडणूक आयोगाच्या कोर्टात चेंडू टाकताना अनेक प्रश्न उपस्थित केले आहेत. निवडणूक आयोग यावर काही कारवाई करणार का, असा सवालही त्यांनी केला आहे.

मागील निवडणुकीत मतचोरी झाल्याचा आरोप राहुल गांधी यांनी केला आहे. तसेच बिहारमधील एसआयआरला विरोध करत त्यांनी बिहारमध्ये व्होट अधिकार यात्राही काढली आहे. काही दिवसांपूर्वीच त्यांनी निवडणूक आयोगावर गंभीर आरोप केले आहेत. भाजपला निवडणूक जिंकून देण्यासाठी निवडणूक आयोग काम करत आहे, असा आरोप त्यांनी केला होता.

मीडिया रिपोर्टनुसार, गुजरातमधील या १० अज्ञात राजकीय पक्षांना २३ जणांकडून देणग्या देण्यात आलेल्या आहेत. देणग्या घेणाऱ्या राजकीय पक्षांनी लोकसभा आणि विधानसभा निवडणुकांमध्ये आपापले उमेदवार उभे केले होते. या पक्षांना दोन्ही निवडणुकांमध्ये एकूण ५४०६९ मते मिळाली आहेत.