भारताची राजधानी दिल्लीमध्ये एक जबरी चोरी झाली आहे. येथील ऐतिहासिक लाल किल्ल्यामध्ये चोरांनी तब्बल एक कोटी रूपयांच्या सोन्याच्या कलशावर हात साफ केला आहे. लाल किल्ल्यामध्ये जैन धर्माचा एक कार्यक्रम सुरू होता. त्यावेळी चोरांनी डाव साधला. त्यांनी हिरे अन् पाचूंनू जडवलेला सोन्याचा कलश चोरला. या कलशाची किमत तब्बल एक कोटींपेक्षा जास्त असल्याचे समोर आले आहे. धक्कादायक म्हणजे, जैन धर्माच्या या कार्यक्रमासाठी दिल्ली पोलिसांचा तगडा, कडेकोट बंदोबस्त होता. सुरक्षेच्या चिंधड्या उडवत चोरांनी हिऱ्याने मढलेला सोन्याचा कलश लंपास केला आहे. या जबरी चोरीमुळे दिल्ली पोलिसांच्या सुरक्षेवर प्रश्नचिन्ह उपस्थित झालाय.

राजधानी दिल्लीमधील लाल किल्ला परिसरात जैन समाजाचं एक धार्मिक अनुष्ठान सुरूये. या धार्मिक कार्यक्रमात सर्वजण मग्न असतानाच चोरांनी एक कोटींच्या कलशावर हात साफ केला. हा कलश 760 ग्रॅम सोने,150 ग्रॅम हिरे, माणिक मोती, पन्ना यांनी मढवलेला होता. त्याची बाजारातील किंमत एक कोटींच्या घरात होती. एकदम चित्रपटाच्या पटकथेप्रमाणे चोरांनी शिताफीने कलश चोरला. काही काळ कुणाच्याही ही बाब लक्षात आली नाही. पण काही वेळानंतर कलश न दिसल्याने कार्यक्रमाच्या स्थळी एकच खळबळ उडाली.

लाल किल्ला परिसरातून कलश चोरीला गेल्याची बातमी दिल्लीमध्ये वाऱ्यासारखी पसरली. पोलिसांना ही माहिती समजताच घटनास्थळी धाव घेतली. पोलिसांनी तात्काळ कार्यक्रम स्थळावरील सीसीटीव्ही फुटेज तपासले. त्यांना काही व्यक्तींच्या संशयास्पद हालचाली दिसून आल्या आहेत. पोलिसांकडून त्यांची ओळख पटवण्यात येत आहे. चोरांना पकडण्यासाठी पोलिसांनी खास पथकाची नेमणूक केली आहे. दिल्ली पोलिसांनी या प्रकरणी गुन्हा दाखल केला असून तपास सुरू आहे.