गाझियाबादमधील राजनगर एक्स्टेन्शन परिसरातून संतापजनक घटना समोर आली आहे. एका मॉलच्या बेसमेंटमध्ये ७ वर्षांच्या मुलीवर अत्याचार करून तिची हत्या करण्यात आली. त्यानंतर मॉलच्या बेसमेंटमध्येच मुलीला टाकून आरोपी फरार झाला. दरम्यान बेसमेंटमध्ये मृतदेह आढळल्याने संपूर्ण परिसरात खळबळ उडाली आहे. या घटनेमुळे स्थानिक नागरिकांमध्ये तीव्र संतापाचे वातावरण निर्माण झाले असून आरोपींना कठोर शिक्षा देण्याची मागणी होत आहे. पोलीस या घटनेचा पुढील तपास करत आहेत.

मिळालेल्या माहितीनुसार, मृत मुलीचे आई-वडील संबंधित मॉलच्या बांधकामावर मजुरीचे काम करतात. ते कामाच्या ठिकाणीच झोपडीत वास्तव्यास आहेत. शुक्रवारी संध्याकाळपासून ही मुलगी बेपत्ता होती. कुटुंबीयांनी तिचा परिसरात सर्वत्र शोध घेतला, मात्र ती सापडली नाही. अखेर शनिवारी पहाटे सुमारे एक वाजण्याच्या सुमारास मॉलच्या बेसमेंटमध्ये एका मुलीचा मृतदेह पडल्याची माहिती पोलिसांना मिळाली. घटनास्थळी पोहोचलेल्या पोलिसांनी मृतदेह ताब्यात घेऊन तपास सुरू केला.

मुलीच्या शरीरावर गंभीर जखमांच्या खुणा आढळून आल्या होत्या. शवविच्छेदन अहवालात तिच्या डोक्याला झालेल्या गंभीर दुखापतीमुळे मृत्यू झाल्याचे स्पष्ट झाले आहे. तसेच, मृत्यूपूर्वी तिच्यावर लैंगिक अत्याचार झाल्याचीही धक्कादायक माहिती अहवालातून समोर आली आहे.प्राथमिक तपासात मुलीला मॉलच्या वरच्या मजल्यावरून खाली फेकण्यात आल्याची शक्यता पोलिसांनी व्यक्त केली आहे.

कुटुंबीयांच्या तक्रारीवरून पोलिसांनी अपहरण, बलात्कार, खून आणि पॉक्सो अंतर्गत आरोपी विरोधात गुन्हा दाखल केला आहे. या प्रकरणात आतापर्यंत चार ते पाच संशयितांना ताब्यात घेऊन चौकशी सुरू करण्यात आली आहे. ओळख पटलेले दोन संशयित सध्या फरार असून त्यांचा शोध घेण्यासाठी पोलिसांकडून विविध ठिकाणी छापेमारी केली जात आहे. परिसरातील सीसीटीव्ही फुटेजचीही बारकाईने तपासणी सुरू आहे.पोलिस अधिकाऱ्यांनी या प्रकरणाचा सखोल तपास सुरू असून दोषींना कोणत्याही परिस्थितीत सोडले जाणार नाही, असे आश्वासन दिले आहे.