Net Worth of Political Parties in India: कोरोना महामारीच्या २०२० ते २०२२ या लावण्यात आलेल्या लॉकडाऊनमुळे अनेक कंपन्यांना फटका बसला. परिणामी लाखो नागरिकांच्या नोकऱ्या गेल्या, हातातील काम गेल्याने अनेकांचे उत्पन्न कमी झाले. यामुळे भारतीय अर्थव्यवस्थेलाही मोठा फटका बसला. मात्र, याच काळात राष्ट्रीय पक्षांच्या संपत्तीत कमालीची वाढ झाल्याचं पाहायला मिळालं. (Latest Marathi News)

असोसिएशन फॉर डेमोक्रॅटिक रिफॉर्म्स (एडीआर) या संस्थेने नुकतीच राष्ट्रीय पक्षांच्या संपत्तीची आकडेवारी जाहीर केली आहे. यामध्ये भाजप (BJP), काँग्रेस, राष्ट्रवादी काँग्रेस पार्टी, बहुजन समाज पार्टी, कम्युनिस्ट पार्टी ऑफ इंडिया (CPI), माओवादी CPI(M), तृणमूल काँग्रेस आणि नॅशनल पीपल्स पार्टी या आठ राष्ट्रीय पक्षांचा समावेश होता.

या अहवालातून ही माहिती समोर आली आहे. आकडेवारीनुसार, गेल्या एक वर्षात राष्ट्रीय पक्षांच्या संपत्तीत सुमारे १ हजार ५३१ कोटींची वाढ झाली आहे. २०२०-२१ मध्ये ७ हजार २९७ कोटी असलेली राष्ट्रीय पक्षांची संपत्ती २०२१-२२ मध्ये तब्बल ८ हजार ९२९ कोटींवर गेली आहे.

म्हणजेच काय तर एका वर्षात या ८ राष्ट्रीय पक्षांच्या संपत्तीत सुमारे २१ टक्क्यांनी वाढ झाली आहे. केवळ मायावती यांच्या बहुजन समाज पक्षाची संपत्ती घटली आहे. तर तृणमूल काँग्रेसच्या मालमत्तेत सर्वांत जलद म्हणजे वर्षभरात १५१ टक्क्यांची वाढ झाली आहे.

भाजपच्या संपत्तीत सर्वाधिक वाढ

एडीआरच्या अहवालानुसार, २०२०-२१ मध्ये, भाजपने ४९९०.१९ कोटी रुपयांची एकूण संपत्ती घोषित केली होती. २०२१-२२ मध्ये एका वर्षानंतर त्यात २१.७ टक्क्यांची वाढ होऊन ६०४६.८१ कोटी रुपये इतकी झाली. तर याच कालावधीत काँग्रेसने ६९१.११ कोटी रुपयांची संपत्ती घोषित केली होती. यामध्ये आता १६.५८ टक्क्यांची वाढ झाली असून ती ८०५.६८ कोटी रुपयांवर गेली आहे.

Edited by - Satish Daud