अक्षय बडवे, साम टीव्ही, प्रतिनिधी

FIITJEE Scam : फिटजी कोचिंग सेंटरचा स्कॅम समोर आला आहे. या कोंचिग क्लासेसमध्ये एका वर्षासाठी ३ ते ४ लाख रुपये फी घेतली जात असे. पुण्यातील ३०० पेक्षा जास्त विद्यार्थ्यांची या सेंटर स्कॅममध्ये फसवणूक झाल्याची माहिती समोर आली आहे. पुण्यातील सेंटर बंद पडले आहे. पुण्यानंतर ठाणे, नागपूरमधीलही फिटजी कोचिंग सेंटर बंज झाले आहेत.

पुणे, पिंपरी चिंचवड परिसरातील ३०० जणांची या स्कॅममध्ये फसवणूक झाली आहे. जीईईसारख्या स्पर्धा परीक्षा देणाऱ्या विद्यार्थ्यांनी या कोचिंग क्लासची फी भरली होती. जुलै २०२४ पासून क्लासचे सेंटर बंद आहे. याबाबतीत पालकांनी तत्कालीन जिल्हाधिकाऱ्यांकडे तक्रार केली होती. दरम्यान हा क्लासचा स्कॅम समोर आला.

महाराष्ट्रातील प्रमुख शहरांसह उत्तर भारतातील अनेक शहरांमध्ये फिटजी स्कॅम झाला आहे. उत्तर भारतातील लखनऊ, मेरठ, दिल्ली, पटना, इंदौर, भोपाळ यांसारख्या शहरांमध्ये फिटजी सेंटरला टाळे लागले आहे. अनेक सेंटरमधील शिक्षकांनी कंपनी सोडल्याची माहिती समोर आली आहे. फसवणूक प्रकरणी फिटजी संस्था चालकांच्या विरोधात उत्तर प्रदेशच्या गाझियाबाद मध्ये गुन्हा दाखल करण्यात आला आहे.

१९९२ मध्ये आयआयटी दिल्लीचे पदवीधर डी. के. गोयल यांनी फिटजी कोचिंग सेंटरची स्थापना केली होती. सहावी ते बारावीच्या विद्यार्थ्यांना भारतीय तंत्रज्ञान संस्था (आयआयटी) आणि नॅशनल इन्स्टिट्यूट ऑफ टेक्नॉलॉजीच्या (एनआयटी) या स्पर्धा परीक्षांसाठी प्रशिक्षण दिले जात असे.