कानपूरच्या पनकी पॉवर हाऊसमध्ये कार्यरत असलेल्या सहायक इंजिनीअर विनीत दुबे यांचा हेअर ट्रान्सप्लांट करताना मृत्यू झाल्याची धक्कादायक घटना घडली आहे. विनीत हे १३ मार्च रोजी एका खासगी क्लिनिकमध्ये हेअर ट्रान्सप्लांट करण्यासाठी गेले होते. यावेळी डॉक्टरने विनीत यांना इंजेक्शन दिलं. त्यानंतर त्यांचा चेहरा सुजला. काही वेळात त्यांची तब्येत बिघडली. तब्येत अधिक बिघडल्यानंतर विनीत यांना रुग्णालयात दाखल केलं. त्यानंतर १५ मार्च रोजी विनीत यांचा मृत्यू झाला.

विनीत दुबे यांचा मृत्यू झाल्यानंतर क्लिनिक बंद करून डॉक्टर पळाली. डॉक्टर रुग्णालयातील रुग्णांनाही सोडून गेली. मृत विनीत यांच्या पत्नीने अनेकदा पोलिसांत तक्रार दिली. मात्र, पोलिसांकडून कारवाई करण्यात आली नव्हती. त्यानंतर विनीत यांच्या पत्नीने मुख्यमंत्र्यांच्या पोर्टलवर तक्रार केल्यानंतर ५४ दिवसांनी एफआयआर नोंदवण्यात आला.

मृत विनीत दुबे यांची पत्नी जया यांनी म्हटलं की, 'डॉक्टरने उपचारादरम्यान संपूर्ण माहिती दिली नाही. त्यानंतर अचानक क्लिनिक बंद करून पळाली'. विनीत यांच्या नातेवाईकांनी आरोपीला वाचवण्यासाठी पोलिसांनी निष्काळजीपणा केल्याचा आरोप केला. या घटनेनंतर स्थानिक लोकांनीही गंभीर आरोप केला आहे. शहरात मान्यता न घेता चालवण्यात येणारे क्लिनिक लोकांच्या जीवाला धोका निर्माण करत असल्याचा आरोप स्थानिकांनी केला आहे.

नेमकं काय घडलं?

विनीत यांची बायको दोन मुलांना घेऊन माहेरी गेली होती. दुसरीकडे विनीत यांनी १२ मार्च रोजी कानपूरमध्ये हेअर ट्रान्सप्लांट करण्याचा निर्णय घेतला. विनीत यांनी डॉक्टरशी संपर्क करून प्रक्रिया सुरु केली. हेअर ट्रान्सप्लांट करताना डॉक्टरने इंजेक्शन दिलं. मात्र, विनीत यांची तब्येत बिघडली. तब्येत बिघडल्यानंतर रुग्णालयात दाखल केलेल्या विनीत यांचा १५ मार्च रोजी मृत्यू झाला. विनीत यांच्या मृत्यूने त्यांच्या कुटुंबीयावर दु:खाचा डोंगर कोसळला आहे.