देशातील हवामान यंदा सातत्याने बदलताना पाहायला मिळतं आहे. मात्र आता नागरिकांसाठी आनंदाची बातमी समोर आली आहे. १६ मे पर्यंत भारतात मान्सून दाखल होणार आहे. गेल्या काही दिवसांपासून अनेक राज्यांमध्ये कडक उन्हाचा तडाखा बसत असताना आता काहीसा दिलासा मिळणार आहे.

हवामान विभागाच्या अंदाजानुसार, यंदा मान्सून नेहमीपेक्षा लवकर दाखल होण्याची शक्यता आहे. साधारणपणे जूनच्या सुरुवातीला देशाचे प्रवेशद्वार असलेल्या केरळमध्ये मान्सून यंदा २५ मे च्या सुमारासच केरळमध्ये पोहोचू शकतो असा अंदाज व्यक्त करण्यात आला होता. मात्र त्याआधीच १६ मे रोजी तो दक्षिण बंगालचा उपसागर, अंदमान समुद्र आणि अंदमान-निकोबार बेटांवर सक्रिय होण्याची शक्यता व्यक्त करण्यात आली आहे.

हवामान तज्ज्ञांच्या मते, ‘एल निनो’च्या प्रभावामुळे मान्सूनच्या हालचालींमध्ये बदल होत असून, यंदा तो लवकर येण्याचे संकेत आहेत. तसेच, IMD च्या अंदाजानुसार, अनुकूल हवामानामुळे मान्सून ६ जून रोजी कोकणात दाखल होणार आहे. त्यामुळे उकाड्याने हैराण झालेल्या कोकणकरांना दिलासा मिळण्याची अपेक्षा आहे.

उत्तर भारतातही काही भागांत हलक्या ते मध्यम पावसाची शक्यता असून, जम्मू-काश्मीर, लडाख, हिमाचल प्रदेश आणि उत्तराखंडमध्ये पावसासोबतच हिमवृष्टीचीही शक्यता आहे. तर ईशान्य भारतातील आसाम, मेघालय, नागालँड, मणिपूर, मिझोराम आणि त्रिपुरा या राज्यांमध्ये मेघगर्जनेसह पावसाचा इशारा देण्यात आला आहे. एकूणच, बदलत्या हवामानामुळे नागरिकांनी सतर्क राहणे आवश्यक असून, पुढील काही दिवसांत पावसाची तीव्रता वाढण्याची शक्यता नाकारता येत नाही.